قىزىلوردادا «قورقىت اتا اۋەجايىنىڭ» جاڭا تەرمينالى حالىقارالىق تالاپتارعا ساي. بۇل تۋرالى ورتالىق كوممۋنيكاتسيالار قىزمەتىنىڭ بريفينگىندە قىزىلوردا وبلىسىنىڭ اكىمى نۇرلىبەك نالىباەۆ اتاپ ءوتتى.
تەرمينالعا «بولات وتەمۇراتوۆ قورى» الەۋمەتتىك جاۋاپكەرشىلىك شەڭبەرىندە 16 ملرد 600 ملن تەڭگە ينۆەستيتسيا سالدى. اۋەجايدىڭ ينجەنەرلىك-كوممۋنيكاتسيالىق ينفراقۇرىلىمىنا، اۆتوجول سالۋعا، اۋماعىن اباتتاندىرۋعا، جارىقتاندىرۋعا جەرگىلىكتى بيۋدجەتتەن 4 ملرد. 300 ملن تەڭگەدەن استام قاراجات ءبولىندى. حالىقارالىق تالاپتارعا ساي كەلەتىن جاڭا نىساندا ىشكى جانە حالىقارالىق رەيستەرگە، ترانزيتتىك جولاۋشىلارعا ارنالعان، CIP زالدارى، جۇكتى اۆتوماتتى تۇردە بەرۋ جۇيەسى، «Duty Free» ايماعى، ساۋدا نۇكتەلەرى، مەدپۋنكت، كافە، عيبادات ەتۋ، جۇك ساقتاۋ، انا مەن بالا بولمەلەرى بار. ەكى قاباتتى عيماراتتا ساعاتىنا 250 جولاۋشىعا 10 تولقۇجات باقىلاۋ كابيناسى ارقىلى قىزمەت كورسەتىلەدى.
ايتا كەتەيىك، «قورقىت اتا اۋەجايى» سوڭعى 9 ايدا جولاۋشىلار مەن جۇك تاسىمالىندا جاقسى ناتيجەلەرگە قول جەتكىزدى. قاڭتار-قىركۇيەك ايلارىندا اۋەجايدا 264 506 جولاۋشىعا قىزمەت كورسەتىلىپ، وتكەن جىلدىڭ سايكەس كەزەڭىمەن سالىستىرعاندا 20%-عا ارتقان. سونىمەن قاتار، وسى ۋاقىت ارالىعىندا رەيستەر سانى 1420-عا جەتكەن. بۇل «قورقىت اتا اۋەجايى» كورسەتكىشتەرىنىڭ تۇراقتى ءوسىمىن جانە اۋە تاسىمالىنىڭ جوعارى بەلسەندىلىگىن راستايدى.
