اقش پرەزيدەنتى دجو بايدەن ۋكرايناعا جاياۋ اسكەرگە ارنالعان مينالار جەتكىزۋدى ماقۇلدادى، دەپ حابارلايدى "ادىرنا" ۇلتتىق پورتالى The Washington Post گازەتىنە سىلتەمە جاساپ.
بۇل تۋرالى 19 قاراشا كۇنى اتى-ءجونىن جاسىرعان ەكى امەريكالىق شەنەۋنىك مالىمدەگەن.
بۇل وق-دارىلەردى قولدانۋ تەك ۋكراينا اۋماعىمەن شەكتەلەدى.
مينالار ۋكراينا قارۋلى كۇشتەرى ءۇشىن ۋاقىت وتە كەلە وزدىگىنەن جويىلاتىن نەمەسە باتارەيا قۋاتىن جوعالتىپ، بەلسەندى بولماي قالاتىن تۇرلەرگە جاتادى. بۇل جەرگىلىكتى تۇرعىندار ءۇشىن قاۋىپ-قاتەردى ازايتادى.
اقش قورعانىس مينيسترلىگى بۇل وق-دارىلەردى جەتكىزۋدى رەسەي اسكەرىنىڭ شابۋىلىن تەجەيتىن ەڭ ءتيىمدى قادامداردىڭ ءبىرى رەتىندە قاراستىرادى.
سوڭعى كۇندەرى ۆاشينگتوننىڭ ۋكرايناعا اسكەري قولداۋ كورسەتۋ جونىندەگى بىرنەشە شەشىمى جاريا بولدى. 17 قاراشادا بىرقاتار امەريكالىق باق اقش-تىڭ ۋكرايناعا بەرگەن ۇزاق قاشىقتىقتاعى قارۋلارمەن رەسەي اۋماعىنا سوققى جاساۋدىڭ شەكتەۋلەرىن الىپ تاستاعانىن حابارلادى.
The New York Times گازەتىنىڭ دەرەككوزدەرىنىڭ ايتۋىنشا بۇل اقپارات ATACMS تاكتيكالىق زىمىراندارى تۋرالى.
«پەنتاگون ۋكرايناعا 275 ميلليون دوللار (شامامەن 260 ميلليون ەۋرو) كولەمىندە جاڭا اسكەري كومەك پاكەتىن جونەلتۋدى جوسپارلاپ وتىر»،- دەپ حابارلادى Associated Press اگەنتتىگىنىڭ دەرەككوزدەرى. بىراق ەگجەي-تەگجەيلى تولىق اقپارات بەرىلمەدى.
اقش-تاعى كەلەسى پرەزيدەنت، دونالد ترامپ، ەكى ايدان كەيىن بايدەندى الماستىرادى. رەسپۋبليكاندىق ترامپ ۆاشينگتوننىڭ كيەۆكە كورسەتكەن قارجىلىق جانە اسكەري كومەك كولەمىن بىرنەشە رەت سىناپ، سوعىستى 24 ساعات ىشىندە اياقتاۋعا ۋادە بەرگەن ەدى. بىراق ناقتى قالاي ەكەنى تۋرالى تۇسىندىرمەدى.
دەگەنمەن، ترامپ ۋكرايناعا وزدەرىنىڭ حالىقارالىق دەڭگەيدە تانىلعان تەرريتورياسىنىڭ ءبىر بولىگىنەن باس تارتۋدى جانە وسىلايشا اسكەري قاقتىعىستى اياقتاۋعا كومەكتەسۋدى ۇسىنعان بولاتىن.
