الماتى وبلىسى تالعار اۋدانى پانفيلوۆ اۋىلدىق وكرۋگىنىڭ ەكس-اكىمى نۇرعالي اپپازوۆ 2020 جىلى بەلسەندىگە قارۋلى شابۋىل جاساعانى ءۇشىن جانە 2022 جىلى اكىم قىزمەتىندە بولعان كەزىندە جەر ماسەلەلەرى بويىنشا الاياقتىق ارەكەتتەرى ءۇشىن سوتتالعان دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
2019 جىلى نۇرعالي اپپازوۆ تالعار اۋدانى اكىمدىگى عيماراتى جانىندا عاليا ارزاماسوۆا ەسىمدى بەلسەندىگە قارۋلى شابۋىل جاساعاننان كەيىن شۋدىڭ ورتاسىندا قالدى. شابۋىلعا قاتىسى بار دەپ تانىلعانداردىڭ قاتارىندا ەكس-اكىم مەن ونىڭ جۇرگىزۋشىسى بولدى. ولارعا قارسى ءىس "قارۋ قولدانۋ ارقىلى جاسالعان بۇزاقىلىق" بابى بويىنشا قوزعالدى. دەگەنمەن 2019 جىلدىڭ قازان ايىندا اپپازوۆتىڭ 6 312 500 تەڭگە كولەمىندە كەپىل سوماسىن تولەپ، ۋاقىتشا بوساتىلعانى بەلگىلى بولدى.
2020 جىلدىڭ قىركۇيەگىندە تالعار اۋداندىق سوتى نۇرعالي اپپازوۆتى بەلسەندىگە جاسالعان شابۋىل ءىسى بويىنشا 7 جىلعا باس بوستاندىعىنان ايىرىپ، مەملەكەتتىك قىزمەتتە جۇمىس ىستەۋ قۇقىعىنان ايىرۋعا ۇكىم شىعاردى. ونىڭ جۇرگىزۋشىسى تاراپتاردىڭ تاتۋلاسۋىنا بايلانىستى بوساتىلدى.
كوپ ۇزاماي بۇل وقيعا ۇمىتىلماي تۇرىپ، اپپازوۆقا قاتىستى تاعى ءبىر داۋ شىقتى. بۇل جولى ول جەر ۋچاسكەلەرىنە قاتىستى الاياقتىق جاسادى دەپ ايىپتالدى.
2015-2019 جىلدار ارالىعىندا پانفيلوۆ اۋىلدىق وكرۋگىنىڭ اكىمى بولىپ قىزمەت اتقارعان اپپازوۆ، ۇيىمداسقان قىلمىستىق توپ قۇرامىندا الماتى وبلىسىنىڭ كىزىلتۋ اۋىلى ماڭىندا جانە الماتى اۋەجايىنىڭ اينالاسىندا مەملەكەتتىك جەر قورىنان زاڭسىز تۇردە 191 ۋچاسكە ساتۋ ارقىلى 12,733 گەكتار جەردى ساتقان.
2022 جىلدىڭ ماۋسىمىندا اپپازوۆ بيلىكتى اسىرا پايدالانۋ ءارى تەرىس پايدالانۋ جانە الاياقتىق بويىنشا 6 جىلعا باس بوستاندىعىنان ايىرىلدى. العاشقى جازاسىن ەسكەرە وتىرىپ، 8 جىلعا قاماۋ جازاسى تاعايىندالدى.
قىلمىستىق-اتقارۋ جۇيەسى كوميتەتىنىڭ ايتۋىنشا اپپازوۆ جازاسىن تۇرمەدە وتەگەن، بىراق كەيىنىرەك سوت شەشىمىمەن جازاسى جەڭىلدەتىلىپ، ايىپپۇلعا اۋىستىرىلعان.
كەيىنىرەك الماتى وبلىستىق سوتى 2023 جىلدىڭ 14 قىركۇيەگىندە اپپازوۆتىڭ جازاسىن جەڭىلدەتۋ تۋرالى شەشىمنىڭ كۇشىن جويۋ تۋرالى شەشىم قابىلداعان. 2024 جىلعى 8 اقپانداعى سوت وتىرىسىندا بۇل شەشىمنىڭ كۇشىن جويۋ تۋرالى جاڭا شەشىم شىققان. سوندا دا اپپازوۆتىڭ تۇرمەگە قايتا ورالماعانى جانە قىلمىستىق-اتقارۋ جۇيەسىنىڭ مەكەمەلەرىندە تىزىمگە ەنگىزىلمەگەنى بەلگىلى بولدى.
كەيىنىرەك ىشكى ىستەر مينيسترلىگى اپپازوۆتىڭ ۇستالعانىن، ۋاقىتشا ۇستاۋ يزولياتورىنا جىبەرىلگەنىن جانە كولونياعا جىبەرىلۋىن كۇتىپ وتىرعانىن حابارلادى.
