امەريكالىق ميللياردەر يلون ماسكتىڭ تەگەران مەن ۆاشينگتون اراسىنداعى شيەلەنىستى باسەڭدەتۋ ماقساتىندا بۇۇ-داعى يراننىڭ تۇراقتى وكىلى امير سايد يراۆانيمەن كەزدەسكەنى جايلى اقپارات تارادى، دەپ حابارلايدى "ادىرنا" ۇلتتىق پورتالى Anadoly agency-گە سىلتەمە جاساپ.
New York Times دەرەكتەرىنە سايكەس، اتى-ءجونىن جاريالاماۋدى سۇراعان ەكى يراندىق شەنەۋنىكتىڭ ايتۋىنشا، كەزدەسۋ 14 قاراشادا نيۋ-يوركتە وتكەن. ولار بۇل كەزدەسۋدىڭ ءبىر ساعاتتان استام ۋاقىتقا سوزىلعانىن جانە ونىڭ «ءپوزيتيۆتى» جاعدايدا وتكەنىن ايتتى. سونداي-اق، كەزدەسۋ «جاقسى ناتيجەلەرگە» اكەلۋى مۇمكىن دەپ كۇتىلۋدە.
ماسكتىڭ باستاماسىمەن ۇيىمداستىرىلعان بۇل كەزدەسۋدە يراۆاني يرانعا ينۆەستيتسيا سالۋدى ۇسىنعان. سونىمەن بىرگە، ول يرانعا قاتىستى سانكتسيالاردى الىپ تاستاۋ ماسەلەسىن كوتەرۋگە كەڭەس بەرگەن.
بۇۇ-داعى يراننىڭ تۇراقتى وكىلدىگى جانە دونالد ترامپتىڭ ءباسپاسوز حاتشىسى ستيۆەن چۋنگ مۇنداي قۇپيا كەزدەسۋ تۋرالى پىكىر بىلدىرۋدەن باس تارتقان.
يراننىڭ سىرتقى ىستەر ءمينيسترى ابباس ەراكچي 14 قاراشا كۇنى الەۋمەتتىك جەلىلەردە يراننىڭ يادرولىق باعدارلاماسىنا قاتىستى داۋلار تەك ىنتىماقتاستىق پەن ديالوگ ارقىلى شەشىلۋى مۇمكىن ەكەنىن اتاپ وتكەن.
