امەريكالىق CNN تەلەارناسى قازاقستانعا 70 جىلدان كەيىن جولبارىستاردىڭ ورالىپ جاتقانى تۋرالى ماتەريال جاريالادى، دەپ حابارلايدى "ادىرنا" ۇلتتىق پورتالى.
جولبارىستار قازاقستان دالاسىنان 1950-ءشى جىلدارى جويىلىپ كەتكەن بولاتىن. بىراق قازىر ولاردى قايتا ورالتۋ ءۇشىن بارلىق جاعدايلار جاسالۋدا. قىركۇيەك ايىندا نيدەرلاندتان اكەلىنگەن امۋر جولبارىسىنىڭ جۇبى ىلە-بالقاش قورىعىنا جەتكىزىلدى. زوولوگتاردىڭ ايتۋىنشا بۇل ايماق ءبىر كەزدەرى وسى جىرتقىشتاردىڭ تاريحي مەكەنى بولعان.
ورتالىق ازيادا جولبارىستاردىڭ مەكەنى تۇركيادان كورەي تۇبەگىنە، رەسەيدىڭ سولتۇستىگىنەن يندونەزياعا دەيىن تاراعان. قازىر جولبارىستار وزدەرىنىڭ بۇرىنعى مەكەندەرىنىڭ تەك 7%-ىندا عانا بار.
ال ەلىمىزدە بۇل جانۋارلار 1950-ءشى جىلدارى تولىعىمەن جويىلىپ كەتكەن. قايتادان تابيعي ورتاعا قونىستاندىرۋ ءۇشىن قازاقستاندا بۇرىن ءومىر سۇرگەن تۇرگە وتە ۇقساس امۋر جولبارىسى تاڭدالعان.
جولبارىستاردى تابيعاتقا ورالۋ ءۇشىن تاسىمالداۋ جوباسى ءبىرىنشى رەت جۇزەگە اسىرىلدى. ەكى جولبارىس نيدەرلاندتان گەرمانياعا اۆتوكولىكپەن جەتكىزىلىپ، ودان كەيىن التى ساعاتتىق ۇشاق ساپارىمەن قازاقستانعا جەتتى. ءارى قاراي ولاردى تاعى 20 مينۋتتىق ۆەرتولەتپەن قورىققا جەتكىزگەن. بۇل ساپارعا دايىندىق بىرنەشە ونجىلدىقتاردى قامتىعان.
قازاقستان وسى جوبانى 2010 جىلى جاريالاعان جانە كەيىنىرەك ىلە-بالقاش مەملەكەتتىك تابيعي قورىعى قۇرىلدى. ودان بەرى جولبارىستار ءۇشىن قاجەتتى جاعدايلار جاسالدى، ورمان القاپتارى ءوسىرىلدى، اڭدار كوبەيتىلىپ، ولاردىڭ تابيعي ازىعى دايىندالدى. جوبا ساياسي ەرىك-جىگەر مەن ءتيىستى قورعاۋ شارالارىنىڭ ارقاسىندا تابىستى بولدى.
جولبارىستاردىڭ قازاقستانداعى پوپۋلياتسياسى بولاشاقتا ارتىپ، 2035 جىلعا قاراي قورىقتا 50 ۇلكەن مىسىق ءومىر سۇرەتىن بولادى دەپ بولجانۋدا. زوولوگتار بۇل جوبانى تابيعات ساقتاۋ ىسىندەگى ماڭىزدى قادام دەپ اتاپ، ونى تەك وڭىرگە عانا ەمەس، بۇكىل الەمگە ءۇمىت سىيلايتىن جوبا رەتىندە باعالاۋدا.
