قوستاناي وبلىسىنىڭ پروكۋرورلارى پوليتسيا قىزمەتكەرىن ءولتىرىپ، ءۇيىنىڭ اۋلاسىنا تاستاپ كەتكەن قىلمىسكەرگە قاتىستى جاڭا مالىمەتتەردى جاريا ەتتى، دەپ حابارلايدى "ادىرنا" ۇلتتىق پورتالى.
پروكۋراتۋرا قوستاناي وبلىسىنىڭ ۇزىنكول اۋىلىندا ولتىرىلگەن پولياتسيانىڭ ىسىنە قاتىستى زاتتاي دالەلدەردى ۇسىندى. قازىرگى ۋاقىتتا بۇل ءىس سوتتا قارالۋدا. سوتتالۋشىلار قاتارىندا بۇرىن ۇرلىق جاساعانى ءۇشىن جازاسىن وتەگەن، شارتتى تۇردە مەرزىمىنەن بۇرىن بوساتىلعان 35 جاستاعى وبلىس تۇرعىنى بار.
«سوتتا زاتتاي دالەلدەردى زەرتتەۋ بارىسىندا مەملەكەتتىك ايىپتاۋشى الدىن الا جوسپارلانعان، قاتىگەزدىكپەن جاسالعان، قۇرباننىڭ كاسىبي قىزمەتىنەن كەك الۋ ماقساتىندا جاسالعان قاتىگەز قىلمىس تۋرالى تەرەڭ دالەلدەر تابىلعانىن انىقتادى. مەملەكەتتىك ايىپتاۋشىنىڭ ءوتىنىشى بويىنشا سوتتا بۇرىن تەرگەلگەن قىلمىستىق ءىس ماتەريالدارىنىڭ كوشىرمەلەرى زەرتتەلدى. بۇل ءىس بويىنشا سوتتالۋشى 2021 جىلى ۇرلىق جانە پوليتسەيدىڭ ومىرىنە قول سۇعۋ ءۇشىن باس بوستاندىعىنان ايىرىلعان بولاتىن. بۇل ماتەريالداردى سوتتالۋشى سوتتالعاننان كەيىن وزىندە ساقتاعان»، – دەپ حابارلادى قوستاناي وبلىسىنىڭ پروكۋراتۋراسى.
ءار قۇجاتتاعى لاۋازىمدى تۇلعالاردىڭ فاميليالارىنىڭ جانىنا سوتتالۋشى ەسكەرتۋلەر جازعان. سونىمەن قااتر، تەرگەۋشى مەن ساراپشىنىڭ اتى-ءجونىنىڭ قاسىنان «سويىپ تاستايمىن» دەگەن جازبا تابىلعان.
«قۇرباننىڭ فاميلياسى دوڭگەلەكپەن قورشالىپ، «سويىپ تاستايمىن» دەگەن جازبامەن بەلگىلەنگەن. سوتتا سوتتالۋشى بۇل جازبالاردى كولونيادا وتىرعان كەزدە، پوليتسيا قىزمەتكەرلەرىنە اشۋلانعاندىقتان جازعانىن ءتۇسىندىردى. بۇل جاعدايلار پوليتسيا قىزمەتكەرىن ونىڭ كاسىبي قىزمەتىن ورىنداۋىنا بايلانىستى قاتىگەزدىكپەن ءولتىرۋ ايىبىنىڭ تاعىلۋىنا سەبەپ بولدى. جاڭا ايىپ ءومىر بويى نەمەسە 20 جىلعا دەيىن باس بوستاندىعىنان ايىرۋدى كوزدەيدى»، - دەپ حابارلادى قوستاناي وبلىسىنىڭ پروكۋراتۋراسى.
مەملەكەتتىك ايىپتاۋ سوتقا بەلگىلى بولعان جاعدايلارعا بايلانىستى سوتتالۋشىعا ءومىر بويى باس بوستاندىعىنان ايىرۋ جازاسىن تاعايىنداۋدى ۇسىندى.
ەسكە سالا كەەتيىك، بيىلعى جىلدىڭ 10 مامىرىندا قوستاناي وبلىسىنىڭ ۇزىنكول اۋىلىندا ءۇيىنىڭ اۋلاسىندا اۋداندىق پوليتسيا ءبولىمى قىزمەتكەرىنىڭ زورلىقپەن ولتىرىلگەن دەنەسى تابىلعان ەدى. وبلىستىق پوليتسيا دەپارتامەنتى قايتىس بولعان ادام كريميناليست بولىپ جۇمىس ىستەگەنىن جانە سول كەزدە ەڭبەك دەمالىسىندا ەكەنىن ايتقان بولاتىن.
