استانادا الەمدىك بەستسەللەر – دەنيەل كيزدىڭ تۇڭعىش رەت قازاق تىلىندە جارىق كورگەن «الجەرنونعا ارنالعان گۇل» رومانىنىڭ تۇساۋكەسەرى ءوتتى. كىتاپتى اۋدارۋعا جانە باسىپ شىعارۋعا اتسالىسقان – Allur قازاقستاندىق اۆتوموبيل كومپانياسى جانە «مازمۇنداما» باسپاسى.
ءىس-شارا جاڭا كىتاپتىڭ تۇساۋكەسەرىمەن قاتار، شەتەلدىك شىعارمالاردى قازاق تىلىنە بەيىمدەۋ ماسەلەلەرىن دە قوزعادى. شارادا سپيكەر رەتىندە «مازمۇنداما» باسپاسىنىڭ نەگىزىن قالاۋشى شىڭعىس مۇقان، Allur وكىلى ايگۇل احمەتوۆا جانە ۇلتتىق اكادەميالىق كىتاپحانانىڭ ديرەكتورى عازيزا قۇدايبەرگەن ءسوز سويلەدى، ال جيىننىڭ مودەراتورى پەريزات مىرزاحمەت بولدى. قاتىسۋشىلار اۋدارۋ ءىسى، تۇپنۇسقانىڭ ستيليستيكالىق جانە وي تەرەڭدىگىن ساقتاۋ، سونىمەن قاتار باسپاگەرلەردىڭ ءماتىندى قازاقتىلدى وقىرمان ءۇشىن بەيىمدەۋ كەزىندە تاپ بولاتىن قيىندىقتاردى اتاپ ءوتتى.
اۋدارۋ قۇقىعىنا قول جەتكىزۋگە باسپا وكىلدەرى ءۇش جىل جۇمساعان. اۋدارمانىڭ ءوزى دە ءبىرتالاي ۋاقىت جاسالعان. اراعا بەس جىل سالىپ، وسىنداي شىعارما قازاقستاندىق وقىرمانعا جول تاپتى.
«بۇل اۋدارمانى جۇزەگە اسىرۋ باسقا جۇمىستارمەن سالىستىرعاندا قيىنداۋ ءوتتى. سەبەبى بۇل كىتاپ اقىل-ويىنىڭ دامۋىندا كەمشىلىگى بار، ورفوگرافيا مەن پۋنكتۋاتسيانىڭ ەرەجەلەرىن بىلمەيتىن، قالاي ەستىسە، سولاي جازاتىن بالانىڭ جۇرگىزەتىن كۇندەلىگى رەتىندە جازىلعان. وسى سەبەپتەن العاشقى بولىمدەردى وقۋ كەزىندە قيىندىقتار تۋىنداۋى مۇمكىن. بۇل رومان اقىل-ويىنىڭ دامۋىندا ەرەكشەلىكتەرى بار ادامداردىڭ تاعدىرىنا نازار اۋدارۋعا مۇمكىندىك بەرەدى، وسىدان 50-60 جىل بۇرىن امەريكادا باسىپ شىعارىلسا دا، ءالى كۇنگە دەيىن وزەكتىلىگىن جوعالتپاعان»، - دەپ اتاپ ءوتتى شىڭعىس مۇقان، «مازمۇنداما» باسپاسىنىڭ وكىلى.
«ءبىز وسىنداي ۇلتتىق قۇندىلىقتاردى، مادەني مۇرانى، مەملەكەتتىك ءتىلدى ىلگەرىلەتۋگە جانە ساقتاۋعا كومەكتەسەتىن الەۋمەتتىك باستامالاردى قۋانا قولدايمىز. بۇل ءبىزدىڭ ميسسيامىزعا جانە باسىمدىلىق بەرەتىن باعىتتارىمىزعا سايكەس كەلەدى. تۋعان تىلىمىزدە كونتەنت شىعارىپ، ونى پوپۋلياريزاتسيالاۋعا اتسالىسۋ – كومپانيانىڭ قوعامنىڭ دامۋىنا قوساتىن ۇلەسى. ءبىزدىڭ قازاقستاندىق وقىرماننىڭ بۇل شىعارماعا جوعارى باعا بەرەتىنىنە سەنىمىمىز مول. بۇل باستامامەن توقتاپ قالماي، جاس بۋىننىڭ كىتاپ وقۋعا دەگەن قىزىعۋشىلىعىن ارتتىرۋ ماقساتىندا وسى باعىتتاعى جۇمىستى جالعاستىراتىن نيەتىمىز بار»، - دەدى ايگۋل احمەتوۆا، Allur كومپانياسىنىڭ وكىلى.
كىتاپ تانىمال دۇكەندەر مەن ماركەتپلەيستەردىڭ سورەلەرىندە پايدا بولدى.
دەنيەل كيز — حيۋگو جانە نەبيۋلا سىيلىقتارىنا يە بولعان ايرىقشا اۆتور. ونىڭ شىعارمالارى تەرەڭ فيلوسوفيالىق ويلارى مەن اسەرلى ءستيلىنىڭ ارقاسىندا بۇكىل الەم بويىنشا وقىرمانداردىڭ سۇيىسپەنشىلىگىنە بولەنگەن.
