تۇركى مەملەكەتتەرى ۇيىمىنىڭ XI سامميتىندە تۇركى مەملەكەتتەرى ۇيىمىنىڭ تۋىن بەكىتۋ تۋرالى شەشىم قابىلداندى، دەپ حابارلايدى "ادىرنا" ۇلتتىق پورتالى Caliber.Az-گە سىلتەمە جاساپ.
قابىلدانعان شەشىم ماتىنىندە بىلاي دەلىنگەن:
«تۇركى حالىقتارىن بىرىكتىرەتىن ورتاق تاريحي جانە مادەني قۇندىلىقتاردى مويىنداي وتىرىپ، كوپقىرلى ىنتىماقتاستىقتى نىعايتۋعا، ءوزارا پروگرەسكە، بىرلىك پەن ىنتىماقتاستىقتى كۇشەيتۋگە دەگەن ادالدىعىن راستاي وتىرىپ، 2012 جىلعى 22 تامىزدا بىشكەكتە وتكەن تۇركىتىلدەس مەملەكەتتەر ىنتىماقتاستىعى كەڭەسىنىڭ سىرتقى ىستەر مينيسترلەرى كەڭەسىنىڭ كەلىسىلگەن حاتتاماسىنا نەگىزدەلە وتىرىپ، تۇركى مەملەكەتتەرى باسشىلارىنىڭ كەڭەسى مىناداي شەشىم قابىلدادى:
- تۇركى مەملەكەتتەرى ۇيىمىنىڭ تومەندە كورسەتىلگەن سيپاتتاماسى بار تۋىن بەكىتۋ.
- وسى شەشىمنىڭ 1-تارماعىنا سايكەس، باسقا تۇركى ىنتىماقتاستىق ۇيىمدارىنىڭ تۇستەر سحەماسىن تۇركى مەملەكەتتەرى ۇيىمىنىڭ تۋىنا سايكەستەندىرۋگە جانە وسى ۇيىمداردىڭ جاڭارتىلعان تۋلارىنىڭ بەكىتىلۋىنە كوشۋ».
تۋ ءازىربايجان، قازاقستان، قىرعىزستان، تۇركيا جانە وزبەكستان باسشىلارى – يلحام اليەۆ، قاسىم-جومارت توقاەۆ، سادىر جاپاروۆ، رەجەپ تايىپ ەردوعان جانە شاۆكات ميرزيوەۆتىڭ قولداۋىمەن بەكىتىلدى.
تۋدا سەگىزبۇرىش، جارتى اي جانە جۇلدىز، سونداي-اق تۋرا ساۋلەلەرى بىركەلكى تارالعان كۇن بەينەلەنگەن، ولار كوگىلدىر كوك فوندا ورنالاسقان.
كوگىلدىر فون تازا اسپان، بەيبىتشىلىك پەن وركەندەۋدى بىلدىرەدى. بۇل بىرتەكتى فون تۇركى حالىقتارىنىڭ بىرلىگىن بىلدىرەدى. تاريحي تۇرعىدان العاندا، كوگىلدىر ءتۇس تۇركى مادەنيەتى مەن داستۇرلەرىمەن بايلانىستى، بۇل ونىڭ مادەني ماڭىزدىلىعىن ودان ءارى ارتتىرادى.
سەگىزبۇرىش كوپعاسىرلىق تۇركى مەملەكەتتىلىگىن بىلدىرەدى، تۇراقتىلىقتى، ءوزارا بايلانىستى جانە ورتاق تۇركى مادەني مۇراسىنان تۋىندايتىن كۇشتى بەينەلەيدى. تۇركى جانە يسلام داستۇرلەرىندە سەگىزبۇرىش دانالىقتىڭ سيمۆولى بولىپ تابىلادى، ول ۇيىمدى العا جىلجىتاتىن جولدى نۇسقايتىن شامشىراق ىسپەتتەس.
كۇننىڭ بىركەلكى تارالعان قىرىق ءتۇزۋ ساۋلەسى جارىق، اشىقتىق پەن ومىرشەڭدىكتى بىلدىرەدى. ساۋلەلەر تۇركى الەمىنىڭ ورتاق قۇندىلىقتارى مەن بولاشاققا دەگەن ۇمتىلىسىن ءبىلدىرىپ، ونىڭ جارقىن جانە وركەندەۋگە تولى بولاشاققا بەت الۋ جولىن كورسەتەدى.
جارتى اي مەن جۇلدىز — بۇكىل تۇركى الەمىندە تانىمال سيمۆولدار — مەملەكەتتىلىكتى، ءوسۋدى، بولاشاققا ۇمتىلۋدى جانە پروگرەستى بىلدىرەدى. بۇل ەلەمەنتتەر ۇيىمنىڭ باي تۇركى تاريحىنا نەگىزدەلگەن بولاشاققا ۇمتىلعان ديناميكالىق رۋحىن كورسەتەدى.
بۇل تۋدىڭ ىشىندە تۇركى بولمىسىنىڭ نەگىزگى سيمۆولدارى، بىرلىگى، ورتاق مۇراسى جانە جان-جاقتى ىنتىماقتاستىعى كورىنىس تاپقان، ولار تۇركى مەملەكەتتەرى ۇيىمىنىڭ ميسسياسىنىڭ نەگىزگى ءمانىن قۇرايدى.
