بارلىعى ءۇشىن تەڭ مۇمكىندىك. قاراعاندى وبلىسىندا اۋىل تۇرعىندارى ءۇشىن مەديتسينا قولجەتىمدى بولا باستادى. بيىل اۋىلداردا 14 جاڭا مەديتسينالىق نىسان اشىلدى.
قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگتە دەنساۋلىق ساقتاۋ سالاسىنداعى جەتىستىكتەردى قاراعاندى وبلىسىنىڭ اكىمى ەرماعانبەت بولەكپاەۆ باياندادى.
– پرەزيدەنت مەديتسينالىق قىزمەت كورسەتۋ ساپاسى ارتتىرىپ، ءار ناۋقاسقا ەرەكشە كوڭىل ءبولىپ، دەنساۋلىق ساقتاۋ جۇيەسىن قايتا قۇرۋ مىندەتىن قويدى، –دەپ اتاپ ءوتتى ەرماعانبەت بولەكپاەۆ. – جىل سوڭىنا دەيىن اۋىلدىق جەرلەردە تاعى 27 مەديتسينالىق نىسان اشىلادى. ال كەلەسى جىلى 51 دەنساۋلىق ساقتاۋ مەكەمەسى بوي كوتەرەدى. تەمىرتاۋ مەن بالقاش قالالارىنداعى ەكى اۋرۋحانا قايتا جاڭعىرتىلعاننان كەيىن اۋدانارالىق اۋرۋحاناعا اينالادى. بۇل وبلىس تۇرعىندارىنا مەديتسينالىق كومەك قولجەتىمدى بولادى دەگەن ءسوز.
ايماققا بىلىكتى مەديتسينالىق كادرلارعا قولداۋ كورسەتىلىپ جاتىر. سوڭعى ەكى جىلدا 236 مەديتسينا قىزمەتكەر باسپانالى بولدى. مەملەكەت تاراپىنان بەرىلگەن جاردەماقى كومەگىنىڭ مولشەرى 1,5 ميلليوننان 8,5 ميلليون تەڭگەگە دەيىن ارتتى. بۇگىنە 63 مامانعا قولداۋ كورسەتىلدى. جىل سوڭىنا دەيىن تاعى 20 مەديتسينا قىزمەتكەرگە كومەك كورسەتۋ جوسپارلانىپ وتىر.
پۋلمونولوگيا، كومبۋستيولوگيا جانە كارديولوگياعا ارنالعان قۇرال جابدىقتار ساتىپ الۋ ءۇشىن "قازاقستان حالقىنا" قورى قارجىلاندىرادى.
