اباي وبلىسىنىڭ اكىمى نۇرلان ۇرانحاەۆ ءوڭىردىڭ الەۋمەتتىك-ەكونوميكالىق دامۋىنا بايلانىستى ورتالىق كوممۋنيكاتسيالار الاڭىندا ەسەپ بەردى، دەپ حابارلايدى «ادىرنا» ءتىلشىسى.
جۋرناليستەردىڭ ءبىرى اكىمگە «ۋاقىت بەلدەۋىنىڭ اۋىسۋىنا بايلانىستى ءوزىڭىز باسقاراتىن وبلىستا ساعات كەشكى 5-6 قاراڭعى بولىپ قالادى. بۇل جاعدايعا مەملەكەتتىك مەكەمەدە جۇمىس ىستەيتىن جانە مەكتەپتە ەكىنشى اۋىسىمدا وقيتىن وقۋشىلار قينالىپ جاتقانىن ايتادى. وسى ماسەلە وڭىنان شەشىلۋ ءۇشىن وڭىردە ءبىر توسىن جاعداي بولۋ كەرەك پە؟ ءبىر وقۋشىعا قاستاندىق جاسالعانى سەكىلدى پروبلەما بولۋ كەرەك پە دەگەن سۇراق تۋادى...» دەپ سۇراق قويدى.
وبلىس اكىمى ۋاقىت بەلدەۋىنىڭ اۋىسۋىنا جاۋاپتى ورگان ساۋدا مينيسترلىگى ەكەنىن ەسكەرتتى.
«سولارعا جۇگىنىپ، سولاردان سۇراۋ كەرەك. قازىر مەن سىزگە جاۋاپ بەرە المايمىن. ول ءبىر. ەكىنشىدەن، ءبىر جىل ەڭ كەم دەگەندە كۇتۋ كەرەك. شەشىم قابىلداندى، ونى ءبىز ءار ءۇش اي سايىن اۋىستىرمايمىز عوي. ءبىر جىلدان كەيىن ءبارى تۇسىنىكتى بولادى. سول كەزدە دۇرىس پا، جوق پا دەگەندى كورەمىز. ەڭ كەم دەگەندە ءبىر جىل كۇتۋ كەرەك»، – دەدى ول.
ءجۋرناليستىڭ «وزىڭىزگە وسى ۋاقىت بەلدەۋى ىڭعايلى ما؟» دەگەن سۇراعىنا «ەگەر مەن ءوزىمنىڭ جەكە باسىمدى ايتسام ەشقانداي ىڭعايسىزدىقتى سەزبەيمىن» دەپ قىسقا جاۋاپ بەردى.
