قاراعاندىدا مال ۇرلىعىمەن كۇرەسۋ ماقساتىندا ورناتىلعان باقىلاۋ-وتكىزۋ بەكەتىندە ۇرلانعان جىلقىلاردى تاسىمالداعان جۇك كولىگى ۇستالدى، دەپ حابارلايدى «ادىرنا» ۇلتتىق پورتالى.
وقيعا 2 قاراشا كۇنى ساعات 04:00 شاماسىندا بولعان. پوليتسەيلەر 57 جاستاعى جۇرگىزۋشى باسقارعان كاماز جۇك كولىگىن تەكسەرۋ ءۇشىن توقتاتقان. ونىڭ جانىندا 57 جاستاعى قالا تۇرعىنى مەن 29 جاستاعى ۇلى بولعان.
«كولىكتى تەكسەرۋ كەزىندە 40 جىلقى تابىلدى، جۇرگىزۋشىنىڭ ايتۋىنشا، ولار 57 جاستاعى جولاۋشىعا تيەسىلى. الايدا، بۇل ازامات جانۋارلاردىڭ مەنشىگىن راستايتىن قۇجاتتاردى كورسەتە المادى. تەكسەرۋ بارىسىندا جىلقىلاردىڭ اقتوعاي اۋدانىنىڭ قىستاۋلارىنان قاراعاندىعا ساتۋعا جەتكىزىلمەك بولعانى انىقتالدى»، - دەپ حابارلادى قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتى.
كريمينالدىق پوليتسيا قىزمەتكەرلەرى جانۋارلاردىڭ سۋرەتتەرىن اقتوعاي اۋداندىق بولىمىنە جانە جەرگىلىكتى اۋىل تۇرعىندارىنا ارنالعان چاتتارعا جىبەردى. سۋرەتتەردى كورگەن اۋىل تۇرعىندارىنىڭ ءبىرى، اتتاردىڭ اراسىندا وزىنە تيەسىلى ەكى جىلقىنى تانىپ، بىردەن پوليتسياعا حابارلادى.
قازىرگى ۋاقىتتا بارلىق جانۋارلار پوليتسەيلەردىڭ قورعاۋىمەن ۇشتوبە اۋىلىنداعى ات قوراعا ۋاقىتشا ۇستاۋعا جەتكىزىلدى.
قىلمىستىق ءىس قوزعالىپ، باسقا جابىرلەنۋشىلەردى، سونداي-اق قىلمىسقا قاتىسى بار ادامداردى انىقتاۋ ماقساتىندا تەكسەرۋ جالعاسۋدا.
