ەكى كۇن قاتارىنان ەكى اسكەري قىزمەتكەردىڭ ولىمگە ۇشىراعانى انىقتالدى، دەپ حابارلايدى "ادىرنا" ۇلتتىق پورتالى.
شاحتينسك قالاسىنداعى كوپقاباتتى ۇيلەردىڭ بىرىندە ۇلتتىق ۇلاننىڭ اسكەري قىزمەتكەرىنىڭ ءمايىتى تابىلدى. بۇل وقيعاعا قاتىستى قر ۇلتتىق ۇلانى «ورتالىق» وڭىرلىك قولباسشىلىعىنىڭ ءباسپاسوز قىزمەتى رەسمي مالىمدەمە جاسادى.
«13 قازاندا شاحتينسك قالاسىندا قىزمەتتەن تىس ۋاقىتتا ءوزى تۇرىپ جاتقان پاتەردەن كەلىسىمشارت بويىنشا اسكەري قىزمەتشىنىڭ دەنەسى تابىلدى. بولجامدى اقپاراتقا سايكەس، اسكەري قىزمەتشى وتباسىلىق-تۇرمىستىق جانجال نەگىزىندە وزىنە قول جۇمساعان. قازاقستان رەسپۋبليكاسى ۇلتتىق ۇلانى «ورتالىق»وڭىرلىك قولباسشىلىعى اسكەري قىزمەتشىنىڭ تۋىستارى مەن جاقىندارىنا كوڭىل ايتادى»،—دەلىنگەن حابارلامادا.
اتالعان فاكت بويىنشا قىلمىستىق ءىس قوزعالدى. وقيعانىڭ سەبەپ-سالدارى انىقتالىپ جاتىر.
زاڭ بويىنشا ۇلتتىق ۇلان iشكi iستەر ورگاندارىنىڭ بiرىڭعاي جۇيەسiنە كiرەدi. ۇلاندىقتار جەكە باستىڭ، قوعام مەن مەملەكەتتiڭ قاۋiپسiزدiگiن قامتاماسىز ەتۋگە، ادامنىڭ جانە ازاماتتىڭ قۇقىقتارى مەن بوستاندىقتارىن قورعايدى.
ال 14 قازاندا پريوزەرسك گارنيزونىنداعى اسكەري بولىمدەردىڭ بىرىندە مەرزىمدى قىزمەتتەگى اسكەري قىزمەتكەر ءوزىن-ءوزى اتاپ ءولتىردى. بۇل تۋرالى قۇرلىق اسكەرلەرىنىڭ ءباسپاسوز قىزمەتى ءمالىم ەتتى.
«اسكەري قىزمەتكەر قاراۋىل قىزمەتىندە مىندەتتەرىن ورىنداعان ۋاقىتتا بەكىتىلگەن قارۋىنان باسىنا وق اتقان. اتالعان وقيعا اسكەري قىزمەت وتكەرۋمەن بايلانىستى ەمەس. الدىن الا مالىمەتتەر بويىنشا، مارقۇم وتباسىلىق-تۇرمىستىق جانجال نەگىزىندە وزىنە قول جۇمساعان. قىلمىستىق ءىس قوزعالدى، ءمان-جايلار انىقتالىپ جاتىر»،—دەلىنگەن حابارلامادا.
ايتا كەتەيىك، بيلىك بۇعان دەيىن دە اسكەري قىزمەتكەرلەردىڭ ءولىمىن وتباسىلىق كيكىلجىڭمەن بايلانىستىرعان.
30 قىركۇيەك كۇنى اقتاۋدا اسكەري قىزمەتكەر ۇيىنەن ءولى تابىلدى. اقتاۋ گارنيزونى ءباسپاسوز قىزمەتى «الدىن الا مالىمەتكە ساي، كەلىسىمشارت بويىنشا قىزمەت اتقارعان سەرجانت وتباسىنداعى جانجالدان سوڭ وزىنە قول سالعان» دەگەن مالىمدەمە جاسادى.
ال 21 قىركۇيەكتە پەتروپاۆل قالاسىنداعى ۇيلەردىڭ بىرىندەگى جەرتولەدەن قورعانىس ىستەرى باسقارماسىنىڭ اسكەري قىزمەتكەرى ءولى تابىلدى. سولتۇستىك قازاقستان وبلىسى قورعانىس ىستەرى دەپارتامەنتىنىڭ ءباسپاسوز قىزمەتى «الدىن الا مالىمەت بويىنشا اسكەري قىزمەتشى وتباسىلىق-تۇرمىستىق جانجال سەبەبىنەن سۋيتسيد جاساعان» دەپ اقپارات تاراتتى.
سوڭعى كەزدەرى اسكەري قىزمەتكەرلەردىڭ ءولىمى تۋرالى تاراتىلعان رەسمي مالىمدەمەنىڭ دەنىندە "وتباسىلىق-تۇرمىستىق جانجال نەگىزىندە وزىنە قول جۇمساعان" دەلىنەدى. تاعى دا ۇنەمى دەرلىك قايتالاناتىن تىركەس - ءولىم وقيعالارى "اسكەري قىزمەت وتكەرۋمەن بايلانىستى ەمەس" بولىپ شىعادى. جانە رەسمي مالىمدەمەلەردە وسىنداي وقيعالاردى قىزمەتتەن تىس ۋاقىتتا ءورىس العان دەپ تۇسىندىرۋگە تىرىسۋ بايقالادى. ال شىن مانىندە وقيعالار تەكسەرىلىپ بولماستان، وسىنداي باعاعا يە بولاتىنى تاڭعالدىرادى. اسكەرگە سالساق، تۇيتكىلدىڭ ءبارى وتباسىدان شىققان. ازىرگە وسى ماسەلەگە پارلامەنت تە سۇراۋ سالعان ەمەس، بيلىك تە قوعام قاناعاتتاناتىنداي تۇسىنىك بەرگەن جوق.
