Eki kún qatarynan eki áskerı qyzmetkerdiń ólimge ushyraǵany anyqtaldy, dep habarlaıdy "Adyrna" ulttyq portaly.
Shahtınsk qalasyndaǵy kópqabatty úılerdiń birinde Ulttyq ulannyń áskerı qyzmetkeriniń máıiti tabyldy. Bul oqıǵaǵa qatysty QR Ulttyq ulany «Ortalyq» óńirlik qolbasshylyǵynyń baspasóz qyzmeti resmı málimdeme jasady.
«13 qazanda Shahtınsk qalasynda qyzmetten tys ýaqytta ózi turyp jatqan páterden kelisimshart boıynsha áskerı qyzmetshiniń denesi tabyldy. Boljamdy aqparatqa sáıkes, áskerı qyzmetshi otbasylyq-turmystyq janjal negizinde ózine qol jumsaǵan. Qazaqstan Respýblıkasy Ulttyq ulany «Ortalyq»óńirlik qolbasshylyǵy áskerı qyzmetshiniń týystary men jaqyndaryna kóńil aıtady»,—delingen habarlamada.
Atalǵan fakt boıynsha qylmystyq is qozǵaldy. Oqıǵanyń sebep-saldary anyqtalyp jatyr.
Zań boıynsha Ulttyq ulan ishki ister organdarynyń biryńǵaı júıesine kiredi. Ulandyqtar jeke bastyń, qoǵam men memlekettiń qaýipsizdigin qamtamasyz etýge, adamnyń jáne azamattyń quqyqtary men bostandyqtaryn qorǵaıdy.
Al 14 qazanda Prıozersk garnızonyndaǵy áskerı bólimderdiń birinde merzimdi qyzmettegi áskerı qyzmetker ózin-ózi atap óltirdi. Bul týraly Qurlyq áskerleriniń baspasóz qyzmeti málim etti.
«Áskerı qyzmetker qaraýyl qyzmetinde mindetterin oryndaǵan ýaqytta bekitilgen qarýynan basyna oq atqan. Atalǵan oqıǵa áskerı qyzmet ótkerýmen baılanysty emes. Aldyn ala málimetter boıynsha, marqum otbasylyq-turmystyq janjal negizinde ózine qol jumsaǵan. Qylmystyq is qozǵaldy, mán-jaılar anyqtalyp jatyr»,—delingen habarlamada.
Aıta keteıik, bılik buǵan deıin de áskerı qyzmetkerlerdiń ólimin otbasylyq kıkiljińmen baılanystyrǵan.
30 qyrkúıek kúni Aqtaýda áskerı qyzmetker úıinen óli tabyldy. Aqtaý garnızony baspasóz qyzmeti «aldyn ala málimetke saı, kelisimshart boıynsha qyzmet atqarǵan serjant otbasyndaǵy janjaldan soń ózine qol salǵan» degen málimdeme jasady.
Al 21 qyrkúıekte Petropavl qalasyndaǵy úılerdiń birindegi jertóleden qorǵanys isteri basqarmasynyń áskerı qyzmetkeri óli tabyldy. Soltústik Qazaqstan oblysy qorǵanys isteri departamentiniń baspasóz qyzmeti «aldyn ala málimet boıynsha áskerı qyzmetshi otbasylyq-turmystyq janjal sebebinen sýııd jasaǵan» dep aqparat taratty.
Sońǵy kezderi áskerı qyzmetkerlerdiń ólimi týraly taratylǵan resmı málimdemeniń deninde "otbasylyq-turmystyq janjal negizinde ózine qol jumsaǵan" delinedi. Taǵy da únemi derlik qaıtalanatyn tirkes - ólim oqıǵalary "áskerı qyzmet ótkerýmen baılanysty emes" bolyp shyǵady. Jáne resmı málimdemelerde osyndaı oqıǵalardy qyzmetten tys ýaqytta óris alǵan dep túsindirýge tyrysý baıqalady. Al shyn máninde oqıǵalar tekserilip bolmastan, osyndaı baǵaǵa ıe bolatyny tańǵaldyrady. Áskerge salsaq, túıtkildiń bári otbasydan shyqqan. Ázirge osy máselege parlament te suraý salǵan emes, bılik te qoǵam qanaǵattanatyndaı túsinik bergen joq.
