ورتالىق رەفەرەندۋم كوميسسياسى قازاقستاندا اتوم ەلەكتر ستانتسياسىن سالۋعا ارنالعان رەفەرەندۋمنىڭ الدىن الا قورىتىندىسىن جاريالادى. حالىقتىڭ 71,12%-ى اەس قۇرىلىسىن قولدادى. Exit poll ناتيجەلەرى دە وسى كورسەتكىشتەرگە جاقىن بولدى.
ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ بۇل رەفەرەندۋم قازاقستاننىڭ ساياسي مادەنيەتىنىڭ جاڭا دەڭگەيگە كوتەرىلگەنىن ايعاقتايتىنىن ايتتى.
«جاڭا ساياسي جاعدايدا تاۋەلسىزدىگىمىزدىڭ 33 جىلدىق تاريحىنداعى ءۇش رەفەرەندۋمنىڭ ەكەۋى مەملەكەت باسشىسى قاسىم-جومارت توقاەۆتىڭ باستاماسىمەن ءوتتى. ءسوز جوق، جاڭا ساياسي مادەنيەت ءدال وسىلاي قالىپتاسادى. ءار ازامات قوعام ءۇشىن ماڭىزدى ماسەلەلەردى شەشۋ ىسىنە تىكەلەي ارالاسىپ، ەل تاعدىرىنا ءوزىنىڭ قاتىستى ەكەنىن سەزىنەدى. بۇل – دەموكراتيانىڭ ءىس جۇزىندەگى كورىنىسى»، - دەدى ول.
سونداي-اق ءماجىلىس توراعاسى بۇگىندە دەپۋتاتتاردىڭ وڭىرلەردى ءجيى ارالاپ، حالىقپەن تىكەلەي بايلانىس ورناتىپ جۇرگەنىن اتاپ ءوتتى. ونىڭ سوزىنشە، اتالعان جۇمىستاردىڭ ناتيجەسىندە قوعامدىق سانا وزگەرىپ، جاڭا ساياسي مادەنيەتتىڭ قالىپتاسىپ جاتقانى بايقالادى. تۇرعىندار كەز كەلگەن ماسەلە بويىنشا ءوز پىكىرلەرىن اشىق ايتىپ، ونى بارلىق دەڭگەيدە باتىل قورعاۋدا. بۇل – مەملەكەت باسشىسى قاسىم-جومارت توقاەۆتىڭ ادىلەتتى قازاقستاندى قۇرۋعا باعىتتالعان ساياسي رەفورمالار باعىتىنىڭ ماڭىزدى ناتيجەسى.
«رەفەرەندۋمنىڭ قورىتىندىسى قوعامداعى جالپى كوڭىل-كۇيدىڭ شىنايى بەينەسىن كورسەتەدى. حالىقتىق شتاب بارلىق وڭىرلەردە مىڭداعان كەزدەسۋ وتكىزىپ، قازاقستاندىقتار اەس سالۋدىڭ ەل بولاشاعى ءۇشىن اسا ماڭىزدى ەكەنىن ءتۇسىنىپ وتىرعانىن كورسەتتى. كاسىپكەرلەر، شارۋالار، كەنشىلەر، جۇمىسشىلار، جاستار، مۇعالىمدەر، دارىگەرلەر جانە كوپتەگەن باسقا توپتار دامىعان ەكونوميكاسى بار ەلدە ءومىر سۇرۋگە مۇددەلى ەكەنىن ءبىلدىردى. ولاردىڭ بارلىعى بۇل ماقساتقا جەتۋدىڭ كىلتى ەنەرگەتيكالىق تاۋەلسىزدىك ەكەنىن جانە اەس قۇرىلىسى قاجەتتىگىن تولىق تۇسىنەدى»، - دەدى ەرلان قوشانوۆ.
بەيبىت اتوم – سەنىمدى، قاۋىپسىز، ەكولوگيالىق تازا ەنەرگيا كوزى. بۇل شەشىم قازاقستاننىڭ عىلىم، تەحنيكا، ءوندىرىس جانە اۋىل شارۋاشىلىعى سياقتى سالالارىندا دامۋدىڭ جاڭا كەزەڭىنە وتۋىنە مۇمكىندىك بەرەدى. حالىق ءوزىنىڭ تاڭداۋىن جاساپ، ەل بولاشاعىنا ۇلەس قوستى.
سونىمەن قاتار «AMANAT» پارتياسىنىڭ توراعاسى اەس سالۋدى قولداۋ جونىندەگى حالىقتىق شتابتىڭ بارلىق مۇشەلەرىنە – ساياسي پارتيالاردىڭ، قوعامدىق بىرلەستىكتەردىڭ، كاسىپوداقتار مەن قاۋىمداستىقتاردىڭ وكىلدەرىنە يگى ىسكە ات سالىسقاندارى ءۇشىن العىسىن ءبىلدىردى.
