قاراعاندى وبلىسىندا "تازا قازاقستان" ەكولوگيالىق اكتسياسى جالعاسۋدا. وبلىس ورتالىعىنىڭ ورتالىق ساياباعىندا ەرىكتىلەر ۇلكەن تازالىق شاراسىن ۇيىمداستىرىپ، اۋماقتى رەتكە كەلتىرۋگە كومەكتەستى. ولار قوقىس جينادى، قۇرعاق بۇتاقتاردى شىعاردى، كوگالدار مەن جاياۋ جۇرگىنشىلەر جولدارىن تازارتتى.
"تازا بولسا تابيعات، امان بولار ادامزات!" اكتسياسىنا جۇزدەن استام ادام قاتىستى. قالادا قورشاعان ورتانى جاقسارتۋ ءۇشىن ستۋدەنتتەر مەن وقۋشىلار، جاناشىر تۇرعىندار باس بىرىكتىردى. ەرىكتىلەر مىڭ قاپ قوقىس جينادى.
تازالىق شاراسىنا قاتىسۋشىلار ءتىپتى ەڭ ۇساق تۇرمىستىق قوقىستاردى دا جيناۋعا تىرىستى. بالالار مەن سپورت الاڭدارى رەتكە كەلتىرىلدى.
– اكتسياعا قاتىسۋعا وقۋشىلاردى شاقىردىق. وسكەلەڭ ۇرپاقتىڭ تابيعاتتى باعالاۋى، ونىڭ ساقتالۋىنا قامقورلىق جاساۋى ماڭىزدى. مەنىڭ ويىمشا، ءبىز بىرىگىپ، تاپسىرمانى وتە جاقسى ورىندادىق، – دەپ اتاپ ءوتتى دەمالىس ساياباقتارى مەن گۇلزارلار باسقارماسىنىڭ باسشىسى تالعات بايتوحين.
باستى ماقسات – ەكولوگيالىق مادەنيەتتى قالىپتاستىرۋ.
– ءبىز جاستاردى تابيعاتقا جاۋاپكەرشىلىكپەن جانە ۇقىپتىلىقپەن قاراۋعا شاقىرامىز. ەڭ الدىمەن، لاستانۋدىڭ الدىن الۋ كەرەك، قوقىستى كەز كەلگەن جەرگە تاستاماۋ كەرەك. قالاداعى تازالىق پەن جايلىلىق ارقايسىمىزعا بايلانىستى، – دەيدى جاستار رەسۋرستىق ورتالىعىنىڭ باسشىسى ياكۋب دجامالوۆ.
ەكولوگيالىق سەنبىلىككە قوسىمشا رەتىندە سۋرەت سالۋ شەبەرلىك ساباعى ءوتتى. جاس سۋرەتشىلەر ءوز سۋرەتتەرىندە تابيعاتقا دەگەن سۇيىسپەنشىلىكتەرىن، قورشاعان ورتاعا دەگەن كوزقاراستارىن ءبىلدىردى. ال ماسكوت-قاتىسۋشىلار جاعىمدى كوڭىل-كۇي سىيلادى.
