قازاقستاندا اتوم ەلەكتر ستانساسىن سالۋ ماسەلەسى شىنىمەن دە ءبىزدىڭ قوعامدا كوپتەگەن پىكىرتالاس تۋدىرۋدا.
تالقىلاۋ ەنەرگەتيكالىق تاۋەلسىزدىك، اەس-تىڭ جۇمىس قاۋىپسىزدىگى، ەكولوگيالىق قاۋىپسىزدىك، ەكونوميكالىق تيىمدىلىك، ساياسي نەگىزدىلىك جانە ت.ب. فاكتورلاردىڭ توڭىرەگىندە ءوربىپ جاتىر. سەمەي پوليگونىنداعى يادرولىق سىناقتاردىڭ قاسىرەتتى مۇراسىن جانە چەرنوبىل اەس-داعى اپات سالدارىن جويۋدىڭ قايعىلى تاجىريبەسىن ەسكەرسەك، قازاقستان تۇرعىندارىنىڭ الاڭداۋشىلىعىن تۇسىنۋگە بولادى. اتوم ەنەرگەتيكاسىنا قاتىستى پەسسيميزم جاپونياداعى «فۋكۋسيما-1» اەس-تا بولعان اۋقىمدى تابيعي جانە تەحنوگەندىك اپاتتان كەيىن كۇشەيە ءتۇستى. دەگەنمەن، سول اپاتتىڭ ناتيجەسىندە حالىقارالىق قاۋىمداستىق يادرولىق قاۋىپسىزدىكتى بارلىق اسپەكتىلەردە قامتاماسىز ەتۋدىڭ جاڭا تاسىلدەرىن قابىلدادى. بىراق اەس جوباسىنىڭ توڭىرەگىندە ازاماتتاردىڭ اتوم ەنەرگياسىن بەيبىت ماقساتتا پايدالانۋ تۋرالى حاباردارلىعىنىڭ تومەندىگىنەن تۋىندايتىن نەگىزسىز ۇرەي مەن فوبيا ءالى دە كوپ ەكەنىن اتاپ ءوتۋ كەرەك.
بەيبىت اتوم ەنەرگەتيكاسىنىڭ الەۋەتىن پايدالانۋ ءبىزدىڭ ەلىمىزدە ۇلتتىق ەكونوميكانىڭ جاڭا جوعارى تەحنولوگيالىق سەكتورىن قۇرۋعا مۇمكىندىك بەرەدى.
بۇگىنگى رەفەرەندۋمدا ەل ازاماتتارىنىڭ باسىم بولىگى اەس قۇرىلىسىن قولداپ داۋىس بەرسە، قازاقستاندا قاۋىپسىزدىك جۇيەسى كۇشەيتىلگەن 3+ بۋىنىنا جاتاتىن زاماناۋي يادرولىق رەاكتورلار ورناتىلعان اەس سالىنادى. ونى سالۋ كەزىندە اناعۇرلىم وزىق جانە قاۋىپسىز تەحنولوگيالار مەن ماتەريالدار، جاڭارتىلعان جانە سەنىمدى قورعانىس قۇرالدارى مەن ەنەرگيا كوزدەرى پايدالانىلادى. بۇل «ادام فاكتورىنىڭ» اسەرىن جانە اپات ىقتيمالدىعىن بارىنشا ازايتادى.
بۇل ماسەلەدە مەملەكەتتىڭ ءبىرىنشى كەزەكتەگى مىندەتى اەس سالۋ ەمەس، قازاقستاننىڭ ەنەرگەتيكالىق تاۋەلسىزدىگىن قامتاماسىز ەتۋ ەكەنىن ءتۇسىنۋ ماڭىزدى.
وسى مىندەتتىڭ وزەكتىلىگى كورشىلەس ەلدەردەن ەلەكتر ەنەرگياسىن قىمبات باعاعا ساتىپ الۋ ەسەبىنەن جابىلاتىن ەل ەكونوميكاسى مەن حالقىنىڭ ەنەرگياعا سۇرانىسىنىڭ ارتۋىنان پايدا بولعان ەلەكتر قۋاتىنىڭ جەتىسپەۋىمەن، سونداي-اق جۇمىس ىستەپ تۇرعان گەنەراتسيا نىساندارى مەن ەلەكتر جەلىلەرىنىڭ ابدەن توزۋىمەن بايلانىستى. ەنەرگەتيكا سالاسى ماماندارىنىڭ پىكىرىنشە، اتوم ەنەرگەتيكاسى بىرقاتار وبەكتيۆتى فاكتورلاردىڭ، سونىڭ ىشىندە اۋا رايىنا تاۋەلدى بولماۋى ارقاسىندا، بۇگىنگى كۇنى ءداستۇرلى سارقىلاتىن ەنەرگيا كوزدەرىنە جالعىز ۇزاق مەرزىمدى جانە تۇراقتى بالاما بولىپ قالا بەرەدى. سوندىقتان وتاندىق ەنەرگيا ءوندىرۋ قۋاتىن كەڭەيتۋ جانە ەلدىڭ ەنەرگەتيكالىق قاۋىپسىزدىگىن قامتاماسىز ەتۋ ماقساتىندا ۇكىمەت اەس سالۋدى تاڭداپ وتىر.
داۋرەن ابەن،
قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى حالىقارالىق قاۋىپسىزدىك ءبولىمىنىڭ باسشىسى
