بۇگىندە اەس سالۋدى قولداۋ جونىندەگى حالىقتىق شتاب مۇشەلەرى رەفەرەندۋمدا بەلسەندى داۋىس بەرۋدە. وسىلايشا، التى ساياسي پارتيانىڭ جەتەكشىلەرى – شتاب مۇشەلەرى ءوز داۋىسىن بەردى.
ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ عيماراتىندا ورنالاسقان №163 سايلاۋ ۋچاسكەسىندە داۋىس بەردى.
«بۇگىن – ءبىزدىڭ مەملەكەتىمىز ءۇشىن وتە ماڭىزدى كۇن. ەلىمىزدىڭ بولاشاعىنا قاتىستى ۇلكەن شەشىم قابىلدانۋدا. ەڭ باستىسى، بۇل شەشىمدى حالىق قابىلداپ جاتىر. بۇعان دەيىن ءبىز كونستيتۋتسيالىق رەفورما قابىلدادىق. ونىڭ باستى ماقساتى – ءار ادامنىڭ مەملەكەتتىڭ ساياسي ومىرىنە ەركىن قاتىسۋىن قامتاماسىز ەتۋ. بۇگىن ءبىز سونىڭ ناقتى ىسكە اسقانىن كورىپ وتىرمىز. بارلىق ايماقتاعى ازاماتتارىمىز ءوز داۋسىن بەرىپ جاتىر. وڭىرلەردەن كەلىپ جاتقان اقپاراتتارعا قاراعاندا، بەلسەندىلىك وتە جوعارى. حالىق مەملەكەتىمىزدىڭ بولاشاعى ءۇشىن دۇرىس تاڭداۋ جاسايدى دەپ ويلايمىن»، – دەدى جۋرناليستەردىڭ سۇراعىنا جاۋاپ بەرگەن ەرلان قوشانوۆ.
سونداي-اق، اەس قۇرىلىسى بويىنشا جالپىرەسپۋبليكالىق رەفەرەندۋمدا قازاقستان حالىق پارتياسىنىڭ توراعاسى ەرمۇحامەت ەرتىسباەۆ استاناداعى م. وتەمىسوۆ اتىنداعى وقۋشىلار سارايىندا ورنالاسقان ەلوردالىق ۋچاسكەدە داۋىس بەردى.
«بۇل رەفەرەندۋم – قازاقستان ءۇشىن عانا ەمەس، بۇكىل پوستكەڭەستىك ەلدەر ءۇشىن دە وتە ماڭىزدى وقيعا. حالقىمىزعا ەلدەگى اتوم ەنەرگەتيكاسى سياقتى ستراتەگيالىق سالانىڭ ارى قارايعى دامۋ جولىن وزدەرى شەشىم قابىلداي وتىرىپ ايقىنداۋعا بىرەگەي قۇقىق بەرىلدى»، – دەدى ول.
وسى كۇنى «اق جول» دەموكراتيالىق پارتياسىنىڭ كوشباسشىسى، ءماجىلىس دەپۋتاتى ازات پەرۋاشەۆ استانا قالاسىنداعى №66 مەكتەپ عيماراتىندا ورنالاسقان №165 سايلاۋ ۋچاسكەسىندە داۋىس بەردى.
«قازاقستاندىقتاردى ەنەرگەتيكامىز بەن تۇتاس ەكونوميكامىزدىڭ بولاشاعىنا قاتىستى مۇنداي ماڭىزدى وقيعامەن قۇتتىقتايمىن: دامىعان ەلدەرمەن بىرگە تەحنولوگيالىق جانە پروگرەسسشىل كەلەشەككە قاتار بارامىز با، جوق، الدە، تاس-كومىر داۋىرىندە قالامىز با; بۇل تاڭداۋدى قازاقستان حالقىنىڭ ءوزى جاسايدى»، – دەدى ول.
وسى ۋچاسكەدە «Respublica» پارتياسىنىڭ توراعاسى، ءماجىلىس دەپۋتاتى ايداربەك قوجانازاروۆ تا داۋىس بەردى.
«مەنىڭ ويىمشا بۇگىن – ەلىمىز ءۇشىن وتە ماڭىزدى كۇن. سەبەبى ءبىز ەكونوميكالىق باعىتتا، تاۋەلسىزدىك باعىتىندا ۇلكەن تاڭداۋ جاسايمىز. مەملەكەت باسشىسى ءار قازاقستاندىقتىڭ پىكىرىن ەسكەرۋ ءۇشىن اەس سالۋ ماسەلەسىن رەفەرەندۋمعا شىعاردى»، – دەدى ول.
سونداي-اق، جالپىرەسپۋبليكالىق پلەبيستسيتكە «BAYTAQ» جاسىلدار پارتياسىنىڭ توراعاسى ازاماتحان امىرتاەۆ تا قاتىستى. ول №92 مەكتەپ-ليتسەيىندە ورنالاسقان №53 سايلاۋ ۋچاسكەسىندە داۋىس بەردى.
«ەل ەرتەڭىنە اسەر ەتەتىن شەشىمگە ۇلەس قوسىپ، داۋىس بەرۋ – ازاماتتىق بورىشىم», – دەدى ول.
ال «اۋىل» پارتياسىنىڭ توراعاسى، ءماجىلىس دەپۋتاتى سەرىك ەگىزباەۆ پارتيالاستارىمەن بىرگە كوكشەتاۋ قالاسىنداعى №22 سايلاۋ ۋچاسكەسىندە داۋىس بەردى.
