مەملەكەت باسشىسى ق.ك.توقاەۆتىڭ ءىىى ۇلتتىق قۇرىلتايدا بەرىلگەن تاريحي سانا قالىپتاستىرۋ باعىتىنداعى تاپسىرمالارى اياسىندا باتىس قازاقستان وبلىسىندا «تۇركى الەمى: رۋحاني-مادەني ىنتىماقتاستىقتىڭ جاڭا كەزەڭى» اتتى حالىقارالىق عىلىمي-تەوريالىق كونفەرەنتسيا ءوتتى.
كونفەرەنتسيانىڭ نەگىزگى ماقساتى – ءتۇبى تۇركى حالىقتاردىڭ اراسىندا رۋحاني-مادەني ىنتىماقتاستىقتىڭ جاڭا كەزەڭى اياسىندا ينتەگراتسيالىق پروتسەسستەردى كۇشەيتۋ، ەكونوميكالىق بايلانىس ورناتۋ، الەمدىك وركەنيەتتىڭ دامۋىنا تۇركى الەمىنىڭ ءوز ۇلەسىن قوسۋ.
ءىس-شارا بارىسىندا باتىس قازاقستان وبلىسى اكىمىنىڭ ورىنباسارى ب.نارىمبەتوۆ العى سوزىندە شەت ەلدەردەن كەلگەن قوناقتارعا جىلى لەبىزىن جەتكىزىپ، كونفەرەنتسيانىڭ تاقىرىبىنىڭ ماڭىزدىلىعىن كەلەسى ويمەن ءبىلدىردى: - «مەملەكەت باسشىسى قاسىم - جومارت كەمەلۇلى توقاەۆ تۇركى الەمىن ءححى عاسىردىڭ اسا ماڭىزدى ەكونوميكالىق، مادەني جانە گۋمانيتارلىق وڭىرلەرىنىڭ بىرىنە اينالدىرۋدى كوزدەيتىنىمىزدى 2023 جىلى استانا قالاسىندا وتكەن تۇركى مەملەكەتەرىنىڭ ۇيىمىنىڭ X سامميتىندە اتاپ ءوتىپ، «تۇركى الەمى» - دەگەن ۇعىمدى برەندكە اينالدىرۋدى تاپسىرعانى بارشامىزعا ءمالىم. ءتۇرلى ەلدەر مەن وڭىرلەردى مەكەن ەتكەن 175 ميلليون تۇركىنىڭ تاعدىرى مىقتى مادەني بىرەگەيلىگىنىڭ ارقاسىندا تاريح تولقىنىندا اداسپاي، جاھاندانۋ زامانىندا العا قادام باسۋعا مۇمكىندىك الدى. تۇرىكپا، تۇركسوي، تۇركى اكادەمياسى مەن حالىقارالىق تۇركى مادەنيەتى مەن مۇراسى قورىنىڭ قاجىرلى ەڭبەگى تۇركى كەڭەسىن بەدەلدى ۇيىمعا، «تۇركى الەمى» ۇعىمىن كوپشىلىك مويىنداعان حالىقارالىق ديسكۋرسقا اينالسا، قازىرعى تاندا تۇركى الەمى رۋحاني-مادەني ىنتىماقتاستىعىنىڭ جاڭا كەزەڭى باستالدى دەسەك بولادى».
ءىس-شاراعا الماتى قالاسىنان فيلولوگيا عىلىمدارىنىڭ دوكتورى، پروفەسسور، حالىقارالىق «قازاق ءتىلى» اكادەمياسى مەن حالىقارالىق تۇركىتانۋ ورتالىعىنىڭ پرەزيدەنتى ەردەن قاجىبەك, قىرعىز رەسپۋبليكاسى ۇلتتىق عىلىم اكادەمياسىنىڭ ءداستۇرلى مادەنيەت ورتالىعىنىڭ مەڭگەرۋشىسى، پوفەسسور قادىرالى قونقاباەۆ, وزبەكستان رەسپۋبليكاسىنىڭ قاراقالپاقستاننىڭ اۋىل شارۋاشىلىعى جانە اگروتەحنولوگيا ينستيتۋتىنىڭ گۋمانيتارلىق پاندەر كافەدراسىنىڭ دوتسەنتى، تاريح عىلىمدارىنىڭ كانديداتى باحادىر بەكىمبەتوۆ, باشقۇرتستان رەسپۋبليكاسىنىڭ عىلىم اكادەمياسىنىڭ باس عىلىمي قىزمەتكەرى، پروفەسسور، فيلولوگيا عىلىمدارىنىڭ دوكتورى لۋيزا سامسيتوۆا, اتىراۋ قالاسىنان حالەل دوسمۇحامەدوۆ اتىنداعى اتىراۋ ۋنيۆەرسيتەتى، «حيسمەت بوزانۇلى تابىلديەۆ اتىنداعى كاسپي ءوڭىرىنىڭ تاريحى، ارحەولوگياسى جانە ەتنولوگياسى» عىلىمي-زەرتتەۋ ينستيتۋتى، «جازباشا جانە ارحەولوگيالىق ەسكەرتكىشتەردى زەردەلەۋ» عىلىمي-زەرتتەۋ ورتالىعىنىڭ جەتەكشىسى سايپوللا موللاقاناعاتۇلى جانە ت.ب. قاتىستى.
كونفەرەنتسيانىڭ پلەنارلىق وتىرىسى بارىسىندا كەلەلى ويلار مەن تۇركى مادەنيەتىنە قاتىستى جاڭا زەرتتەۋلەر ناتيجەلەرى باياندالىپ، «.....تۇركىلەر مەكەن قىلعان ءبىر قيانى مەن ءبىر قيانى ۇشقان قۇستىڭ قاناتىن تالدىراتىن ۇلى دالا-ەۋرازيا 4 ميلليون شارشى شاقىرىمنان استام اۋماقتان اسادى، تۇركىتىلدەس حالىقتاردىڭ قاي-قايسىسىنىڭ دا گەوساياساتتا بولسىن، الەمدىك ەكونوميكادا بولسىن، وزىندىك ورنى بار، گەوگرافيالىق ورنالاسۋلارى جاعىنان باتىس پەن شىعىستى، وڭتۇستىك پەن سولتۇستىكتى جالعاستىرار ترانزيتتىك ماڭىزعا يە، وسىنداي ارتىقشىلىقتار تۇركى الەمىنىڭ حالىقارالىق ارەناداعى ورنىنىڭ باسىمدىققا يە ەكەنىنە ايعاق» - دەگەن ويلار ايتىلدى.
