قازاق ءتىلىن مىندەتتى ساناماعان «ForteBank» اق رەسمي وكىلى گۇلنۇر ارالباەۆا قاتەلىك كىمنەن كەتكەنىن ايتىپ، تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
«كەشەدەن بەرى ەل اراسىندا نارازىلىق پەن تۇسىنىسپەۋشىلىك تۋدىرىپ جاتقان ForteBank اتىنان قازاق ءتىلى تالاپ ەتىلمەگەن بوس جۇمىس ورنى بويىنشا Headhunter سايتىنداعى حابارلاندىرۋعا قاتىستى تۇسىنىكتەمە بەرۋدى ءجون كوردىك. ءتىل ماسەلەسى، ونىڭ ىشىندە قازاق ءتىلى ەلىمىزدە وتە ماڭىزدى ەكەندىگىن تۇسىنەمىز جانە ورىن العان وسى جاعداي ءۇشىن شىن جۇرەكتەن كەشىرىم سۇرايمىز»، — دەيدى ارالباەۆا.
سونداي-اق بانك ماماندارى شۇعىل تۇردە تەكسەرىس جۇرگىزىپ، روبوتتان قاتەلىك كەتكەنىن انىقتاعان. ال جاۋاپتى قىزمەتكەر جازالانعان.
«تۇسىندىرە كەتەيىك، Forte-دە بوس ورىن تۋرالى حابارلامانى جاساندى ينتەللەكتكە نەگىزدەلگەن روبوت رەكرۋتەر اۆتوماتتى تۇردە headhunter سايتىنا جىبەرەدى. وسى جولى دا سولاي بولدى. ال جاۋاپتى قىزمەتكەر حابارلاما ءماتىنىن تەكسەرمەگەن. بۇل ورەسكەل قاتەلىك ادامي فاكتوردىڭ كەسىرىنەن ورىن العان. قازىرگى تاڭدا كىنالى قىزمەتكەرلەر ءتيىستى جازاسىن الدى»، — دەيدى بانك وكىلى.
ايتا كەتەيىك، بۇعان دەيىن جەلىدە تاراپ كەتكەن جازبادا جۇمىسقا قابىلداۋ تالاپتارىنىڭ ءبىرى دەپ «Forte Bank» وكىلدەرى «قازاق ءتىلى مىندەتتى ەمەس» ەكەنىن جازعانىن جانە ول الەۋمەتتىك جەلى قولدانۋشىلارى اراسىندا شۋ تۋدىرعان ەدى.
