پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ءماجىلىستىڭ جالپى وتىرىسىنان كەيىن وتكەن ءباسپاسوز ءماسليحاتىندا Magnum ساۋدا جەلىسىنە قاتىستى بويكوت ماسەلەسىنە پىكىر ءبىلدىردى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە قازاقشا قىزمەت كورسەتۋدى وتىنگەنى ءۇشىن جەتكىزۋشىنىڭ جۇمىستان قۋىلۋىنا بايلانىستى باستالعان بويكوت كەڭ تالقىعا تۇسكەن ەدى. جۋرناليستەردىڭ سۇراعىنا جاۋاپ بەرگەن ۆيتسە-پرەمەر بۇل جاعدايدى جەكە ادامدار اراسىنداعى تۇرمىستىق داۋ دەپ اتاپ، الايدا ودان قوعام ءۇشىن ماڭىزدى ساباق الىنۋى ءتيىس ەكەنىن ايتتى.
"بۇل – بار بولعانى جەكە ادامدار اراسىنداعى تۇرمىستىق داۋ. بىراق بۇل بىزگە ۇلكەن ساباق بولدى. ونداي ءتىل ماسەلەلەرىن، ۇلتتىق ماسەلەلەردى تالقىلاعاندا، الەۋمەتتىك جەلىدە جازعاندا اباي بولۋ كەرەك. قاراپايىم عانا 20 ميلليون حالقىمىز بار. تاتۋ بولۋىمىز كەرەك. قازاقتار ايتادى عوي، "اۋىلى ارالاس، قويى قورالاس" بولۋ كەرەك. بىزگە نە كەرەك؟ قاراپايىم، قارادومالاق قازاقتاردىڭ باسى امان بولسىن. ودان باسقا ەشتەڭە كەرەك ەمەس", – دەدى سەرىك جۇمانعارين.
سونىمەن قاتار، ۆيتسە-پرەمەر قازاقشا سويلەۋدى تالاپ ەتكەنى ءۇشىن جۇمىستان شىعارىلعان ازاماتتىڭ قازىرگى تاڭدا باسقا جۇمىسقا ورنالاسقانىن اتاپ ءوتتى.
"مەنىڭ ويىمشا، ول – شەشىلەتىن ماسەلە", – دەپ قورىتىندىلادى ول.
ەسكە سالا كەتەيىك، Magnum جەلىسىنىڭ كۋرەرى جۇمىستان شىعارىلعانى جونىندەگى اقپارات الەۋمەتتىك جەلىدە قىزۋ تالقىعا ءتۇستى. داۋ كۋرەردىڭ تاپسىرىس بەرۋشىدەن قازاق تىلىندە سويلەۋدى تالاپ ەتكەنىنەن باستالدى. كەيىن كومپانيا وكىلدەرى ونىڭ جۇمىستان شەتتەتىلگەنىن ايتتى. وسى وقيعادان كەيىن جەلى قولدانۋشىلارى Magnum دۇكەندەر جەلىسىنە قوعامدىق بويكوت جاريالادى. قازىر الەۋمەتتىك جەلىگە جۇكتەلىپ جاتقان بەينەلەردەن تۇتىنۋشىلاردىڭ ەداۋىر ازايعانىن بايقاۋعا بولادى.
