ءماجىلىس دەپۋتاتى ەلنۇر بەيسەنباەۆ Magnum كومپانياسىنا قاتىستى الەۋمەتتىك جەلىلەردە تاراعان جاعدايعا بايلانىستى پىكىر ءبىلدىردى. ونىڭ ايتۋىنشا، بۇل جاعدايدى ساياسيلاندىرىپ، تىلدىك نەمەسە ۇلتتىق قاقتىعىس رەتىندە كورسەتۋدىڭ قاجەتى جوق.
"بىرىنشىدەن، مانيپۋلياتسياعا جول بەرۋگە بولمايدى. مەن بۇل ماسەلەنى زەرتتەدىم، قارادىم. بۇل – تەك ەڭبەك كودەكسى اياسىندا رەتتەلەتىن دۇنيە. بۇل – جۇمىس بەرۋشى مەن جۇمىسشىنىڭ قارىم-قاتىناسى. ودان ءبىر ساياسي، قوعامدىق رەزونانس تۋدىرىپ، 'قازاق ءتىلى قورلانىپ جاتىر' دەگەن اڭگىمە ەمەس. بۇل – جەكە باستىڭ داۋى", – دەدى دەپۋتات.
ونىڭ ايتۋىنشا، جاعدايعا قاتىستى ناقتى بەينەجازبالار جوق، سوندىقتان ناقتى نە ايتىلعانىن ءبىلۋ مۇمكىن ەمەس.
"سول سەبەپتەن، مەنىڭ ويىمشا، Magnum دا، قوعامداعى كوپ بەلسەندىلەر دە تەك مانيپۋلياتسياعا الدانىپ وتىرعان سياقتى", – دەدى ول.
بەيسەنباەۆ بۇل جاعدايدى ساياسيلاندىرۋ ارقىلى كوپتەگەن ادام جۇمىسىنان ايىرىلۋى مۇمكىن ەكەنىن ايتتى.
"Magnum – ەلىمىزدەگى ءىرى كاسىپورىنداردىڭ ءبىرى. قانشاما قازاق جاستارى سول جەردە جۇمىس ىستەپ ءجۇر. بۇل – ەكى قازاقتىڭ اراسىنداعى كونفليكت. ودان داۋ تۋدىرىپ، 'قازاق ءتىلى قورلاندى' دەپ ايتۋ – ارتىق", – دەدى ءماجىلىس دەپۋتاتى.
ءسوز سوڭىندا ەلنۇر بەيسەنباەۆ باق وكىلدەرىنە دە ۇندەۋ جاساپ، تەكسەرىلمەگەن، ناقتى دەرەگى جوق اقپاراتتى تاراتپاۋعا شاقىردى: "باياعىدا ايتاتىن ەدى عوي: 'ساماۋرىننان سۋ كەتتى دەسە، سامارقاندتى سۋ الدى' دەگەن. سول اڭگىمەنىڭ پۇشپاعىندا كەتۋدىڭ قاجەتى جوق. قويۋ كەرەك ونداي نارسەنى", – دەدى ول.
دەپۋتاتتىڭ ايتۋىنشا، بۇل ماسەلە پارلامەنتتە نەمەسە بۇقارالىق اقپارات قۇرالدارىندا تالقىلايتىن دۇنيە ەمەس.
