«شەكاراسىز تىلشىلەر» حالىقارالىق ۇيىمى ءداستۇرلى تۇردە 3 مامىر كۇنى اتاپ وتىلەتىن دۇنيەجۇزىلىك ءباسپاسوز بوستاندىعى كۇنىندە «الەمدىك ءباسپاسوز بوستاندىعى يندەكسىن» جاريالادى، دەپ حابارلايدى «ادىرنا» ءتىلشىسى.
تىزىمدە ەلىمىزدىڭ ءبىر جىل ىشىندە 8 ساتىعا تومەندەگەنى كورسەتىلگەن. وتكەن جىلى قازاقستانرەيتينگتە 180 ەلدىڭ ىشىندە 134-ورىندا بولسا، بيىل 142-ورىنعا تۇسكەن.
زەرتتەۋ اۆتورلارى كونستيتۋتسيا بويىنشا تسەنزۋراعا جول بەرىلمەسە دە، ونىڭ قازاقستاندا ءالى دە بار ەكەنىن مالىمدەدى. سونداي-اق ەل ۇكىمەتىنىڭ ينتەرنەتتەگى جازبالارعا باقىلاۋدى كۇشەيتكەنىن اتاپ ءوتتى.
«قازاقستان بيلىگى 1997 جىلدان بەرى جۇرگىزىپ كەلە جاتقان «رەپرەسسياشىل رەفورمالار» سالدارىنان ەلدە پروپاگاندا قانات جايدى. بىرنەشە تاۋەلسىز مەديا ينتەرنەت ارقىلى تاراپ، تاۋەلسىز جۋرناليستەر الەۋمەتتىك جەلى ارقىلى حابار تاراتۋعا كوشتى»، – دەپ جازدى ۇيىم.
ءسوز بوستاندىعى دەڭگەيى جونىنەن ورتالىق ازيا ەلدەرى اراسىندا قىرعىزستان 120-ورىنمەن كوش باستادى. ال تۇركىمەنستان (175-ورىن) الەمدەگى ءسوز بوستاندىعى ەڭ ناشار ون ەلدىڭ قاتارىندا كىردى. رەيتينگتتىڭ العاشقى ساتىلارىندا نورۆەگيا، دانيا، شۆەتسيا، نيدەرلاند جانە فينليانديا ەلدەرى تۇر.
