Apple компаниясы iPhone өндірісін Қытайдан Үндістанға көшірмек. 2026 жылдың соңына қарай америкалық нарыққа арналған смартфондардың көпшілігі жаңа зауыттардан шығарылады деп жоспарланып отыр. Бұл туралы 25 сәуірде Reuters агенттігі жазды, деп хабарлайды «Адырна» тілшісі.
Корпорацияның бұл шешіміне Қытайдағы тарифтердің күрт өсуі себеп болған.
Ресми деректерге сүйенсек, компания Үндістанда бір жылда 22 млрд доллардың iPhone смартфондарын шығарған. 2025 жылғы наурызда өндіріс 60%-ға артқан.
Бұған дейін АҚШ президенті Дональд Трамп енгізген 145% көлеміндегі баж салығына жауап ретінде Қытай 125% баж салығын енгізген болатын. Кейін Ақ үй Қытай тауарларына тағы 100% қосымша салық салатынын мәлімдеді. Нәтижесінде АҚШ-тың Қытай тауарларына салатын баж салығының жалпы көлемі 245%-ға жетті.
