Қазақстанның табиғи көрікті жерлерін көру үшін жыл сайын жан-жақтан туристер ағылуда. Мәдениет және спорт министрлігінің мәліметінше, 2023 жылдың алғашқы тоқсанында елге келген турист саны 2,3 есе өскен.
Яғни, қаңтар-наурыз аралығында Қазақстанға 227,7 мың шетелдік турист келген. Бұл 130 мың адамға немесе 2,3 есе көп. Салыстырмалы түрде, өткен жылдың сәйкес кезеңінде Қазақстанға 97 мың шетелдік келген. Ал 1 млн 348 мың қазақстандық ел ішінде саяхаттаған.
Осыдан бай мәдени мұрасы, алуан түрлі табиғи көрікті жерлері және қонақжай халқы бар Қазақстанның тек шетелдік емес, сонымен қатар отандық саяхатшылар үшін де маңызды туристік орынға айналу мүмкіндігін байқауға болады. Дегенмен, бұл әлеуетті іске асыру үшін бірқатар іс-шаралар мен стратегиялық өзгерістер жасалуы керек.
Туристік маршруттар мен гидтерді жылжыту
Қазақстанда табиғи көрікті жерлер жетерлік. Алайда, елдің әртүрлі аймақтарында туристік маршруттарды құру және белсенді түрде жылжыту баяулап тұр. Оны дамыту үшін бағдарлардың, көрікті жерлер мен қызметтердің толық сипаттамасы бар ақпараттық брошюраларды, веб-сайттарды және мобильді қосымшаларды әзірлеу маңызды.
Инфрақұрылымды дамыту
Екінші, туристерге әртүрлі аймақтар арасында саяхаттауды жеңілдету үшін жол инфрақұрылымын жақсарту керек. Қонақ үй және қонақжайлылық секторын, соның ішінде қонақ үйлерді, хостелдерді және қонақ үйлерді салу және дамытуды көбейту керек.
«Kazakh Tourism» АҚ өкілдерінің айтуынша, 2025 жылға дейін Қазақстандағы туризмді дамыту бағдарламасы қабылданған. Онда инфрақұрылымды жақсарту шараларына ерекше көңіл бөлінген.
Жергілікті бизнесті қолдау
Одан кейін, жергілікті кәсіпкерлер үшін туристік бизнесті дамыту жолдары бойынша оқыту бағдарламалары мен семинарлар өткізуді көбейту керек. Сонымен қатар, туристік кәсіпорындарды ашуға қаржылық қолдау көрсету және жеңілдіктер беру маңызды.
Мәдени туризмді ілгерілету
Қазақстан табиғатқа да, пайдалы қазбаларға да, тарихқа да бай. Сондықтан қазақ мәдениетінің байлығын көрсету үшін мәдени шаралар, фестивальдар мен көрмелер ұйымдастыруды қолға алуда. Мұражайлар, археологиялық орындар және ұлттық саябақтар сияқты мәдени және тарихи орындарды қамтитын турларды жасау арқылы туризмге үлес қоса аламыз.
Білім беру бағдарламалары
Оқушылар мен студенттерге туризмнің ел экономикасы және табиғи ресурстарды сақтау үшін маңызы туралы білім беру бағдарламаларын жүргізіп, туристерге қызмет көрсету сапасын арттыру мақсатында гидтер мен аудармашылар үшін курстар мен шеберлік сабақтарын ұйымдастыру керек.
Жарнамалық науқан
Ішкі туризмге назар аудару үшін республикалық деңгейде жарнамалық науқандар жүргізу маңызды. Бүгінде блогерлер, белсенділер әр аймақтың көрікті жерлерін көріп, елге жариялап келеді. Елдің туристік мүмкіндіктері туралы ақпаратты тарату үшін әлеуметтік медиа, теледидар және басқа коммуникациялық арналар да өз үлесін қосуда.
Қызмет көрсету сапасын арттыру
Қызмет көрсету сапасын арттыру үшін туристік кәсіпорындар мен қызмет көрсету бөлімдерінің персоналын арнайы оқыту қажет. Туристерге есте қаларлық тәжірибе беру үшін мәдени ерекшеліктер мен дәстүрлер туралы хабардарлықты арттыру маңызды.
2022 жылы Қазақстан Республикасының Мәдениет және спорт министрлігі елдің туристік саласын дамытудың 2026 жылға дейінгі тұжырымдамасының жаңа жобасын әзірлеген болатын. Тұжырымдамада жоғарыда айтылған маңызды пунктер көрсетілген.
Болжамдық есептеулерге сәйкес, 2026 жылға қарай туризмді дамытамын деген кәсіпкерлерді жаңа шаралармен қамту кемінде 2,5 мың бірлікке жетеді.
Одан бөлек, тұжырымдама шағын, орта және ірі инвестициялық жобаларды іске асыруға көп көңіл бөлмек. 2026 жылға дейін Қазақстан қонақ үйлерінің 95%-дан астамын елге келген кемінде 250 мың шетелдік келуші тіркелетін Е-Qonaq (e-Hotel) ақпараттық жүйесімен қамтамасыз ету жоспарлануда.
Осы арқылы жұмыссыздық мәселесінің шешімін табуға өз үлесі болады. 2026 жылға қарай туризм саласында кемінде 5,5 мың жұмыспен қамтылуды қамтамасыз ету жоспарлануда.
Сонымен қатар, аталған тұжырымдама 2026 жылы ЖІӨ құрылымындағы 8,2%-дық үлес бойынша мақсатқа қол жеткізуге мүмкіндік брмек.
Қазақстанда ішкі туризмді ұлғайту тек экономикалық пайда ғана емес, сонымен бірге ұлттық бірегейлікті нығайтудың, аймақтық экономиканы дамытудың және елдің табиғи мұрасын сақтаудың жолы. Бұл шараларды жүзеге асыру елде туризмді дамыту үшін қолайлы жағдай жасауға көмектеседі және Қазақстанды демалыс пен саяхат үшін әлем тамсанар тартымды орынға айналдырады.
“Адырна” ұлттық порталы
