Properm.ru سايتىنىڭ مالىمەتىنشە، رەسەيدىڭ پەرم قالاسىندا پوليتسيا باسىلىم ءتىلشىسى ۆلاديسلاۆ يۆانەنكونى ۇستاعان. بۇل تۋرالى باسىلىمنىڭ ءوزى جازدى، دەپ حابارلايدى «ادىرنا» ۇلتتىق پورتالى.
سايت اقپاراتىنا سۇيەنسەك، يۆانەنكودا قازاقستان ازاماتتىعى بار. رەسەيدە تۇرىپ كەلە جاتقانىنا 8 جىل بولعان. ۇستالماي تۇرىپ، جۋرناليست ىقتيارحاتىنىڭ كۇشى جويىلعانى جونىندە حابارلاما العان.
بەلگىلى بولعانداي، جۋرناليست 9 قاراشادا ۇستالدى. ءبىراز ۋاقىت بۇرىن ول رەسەي ءىىم-ءنىڭ پەرم ولكەسى بويىنشا باس باسقارماسىنان تۇرۋعا ىقتيارحاتىنىڭ كۇشى جويىلعانى تۋرالى حابارلاما العان.
"ۆلاديسلاۆ يۆانەنكو بۇرىن-سوڭدى اكىمشىلىك نە قىلمىستىق جاۋاپقا تارتىلماعان. Properm.ru رەداكتسياسى ىشكى ىستەر مينيسترلىگىنىڭ پەرم ولكەسى بويىنشا باس باسقارماسىنىڭ وتىنىشىندە كورسەتىلگەن – ىقتيارحات كۇشىنىڭ جويىلۋىنا نەگىز بولعان جايتتار ويدان قۇراستىرىلعان دەپ سانايدى. ودان بولەك، شەشىمگە قاتىستى زاڭمەن بەلگىلەنگەن مەرزىمدە شاعىم تۇسىرىلگەن. قۇقىق قورعاۋ ورگاندارىنىڭ ارەكەتى زاڭسىز، ارتىق دەپ ەسەپتەيمىز جانە قىزمەتكەر مەن رەداكتسياعا قىسىمدى توقتاتۋدى تالاپ ەتەمىز" دەپ جازىلعان رەداكتسيا مالىمدەمەسىندە.
ۇستالعاننان كەيىن يۆانەنكو شەتەلدىكتەردى ۋاقىتشا ۇستاۋ ورتالىعىنا جەتكىزىلدى.
سوت ونىڭ تۇرۋعا ىقتيارحاتىنىڭ جويۋ تۋرالى شەشىمدى توقتاتقانىنا قاراماستان، كەشە يۆانەنكو ەكاتەرينبۋرگ اۋەجايىنا جەتكىزىلىپ، قازاقستانعا جەر اۋدارىلعانى بەلگىلى بولدى.
بۇگىن، 14 قاراشادا پەرمنىڭ كيروۆ اۋداندىق سوتىندا وسى ءىس بويىنشا وتىرىس ءوتۋى كەرەك ەدى.
ء"بىز قۇقىق قورعاۋ ورگاندارىنىڭ ارەكەتتەرىن زاڭسىز دەپ سانايمىز. ءبىز نە بولىپ جاتقاندىعى تۋرالى رەسمي تۇسىنىكتەمە تالاپ ەتەمىز. سونداي-اق، ءتىلشىمىزدى سوتتاردا قورعاۋدى جالعاستىرامىز", - دەدى Properm.ru باس ديرەكتورى دەنيس ۆيحروۆ.
«ادىرنا» ۇلتتىق پورتالى
