Áıelder boksyndaǵy jeńiske jetýdiń joly qandaı? Chempıonattyń kúmis júldegeri óz suhbatynda osy saladaǵy jaǵdaıdy sıpattaıdy.
Qazaqstandyq sportshy Vıktorııa Grafeeva 8-17 naýryzynda Nıshede ótken áıelder boksynan ótken álem chempıonatynda kúmis júldege qol jetkizdi.
Ol óziniń suhbatynda áıelder úshin tosyndaý osy sport túrine qalaı kelgeni jáne sportta bastan keshkenderi jaıly oılarymen bólisken.
- Jeńil atletıkadan boksqa kelýińe ne sebep boldy?
- Jeńil atletıkadan kelýime jaraqat alýym sebep boldy. Boksqa 17 jasymda anamnyń qalaýymen keldim. Oǵan deıin eshqashan sporttyń jekpe-jek túrine kelem dep oılamappyn. Aıaq baspaımyn dep oılap edim. Turaqty túrde bir sport túrimen shuǵyldanbaýym anamnyń meni oqýshylar saraıyna jetelep aparýyna túrtki boldy.
- Álem chempıonatynyń sharshy alańyna shyǵý sizge qandaı áser qaldyrdy?
- Álem chempıonatynan alǵan áserimdi sózben jetkizý qıyn. Árbir sportshy úshin álemdik arenaǵa shyǵý – bıik dáreje. Bul týrnır úshin men kóp qıyn daıyndyqtardan óttim. Sol sátte úlken rıngte úlken aýdıtorııa men jankúıerdiń úmit-senimin sezindim jáne bul maǵan shabyt berdi. Osy tájirbıeden keıin men ózimdi senimdi sezindim. Meniń oıymsha, árbir sportshy osyndaı jarystardan ótýi tıis. Sonda ǵana ol birtýar tulǵaǵa jáne myqty sportshyǵa aınala alady.
- Alǵashqy bapkerińiz, sportqa kelýińiz jaıly aıtyp berseńiz?
- Meniń alǵashqy jáne osy kúnge deıingi jalǵyz bapkerim – Nurlan Muhambetqalıev. 2017 jyly ata-anam Oqýshylar saraıyna alyp kelgende ózge bapkerler sińilim ekeýmizdi «tym kesh keldińder» dep qabyldamaǵan edi . Biraq Nurlan aǵaı bizdi ózine alyp, senim artty. Bizdiń boıymyzdan ózimiz baıqamaǵan qasıetti kórdi. Aǵaıymnyń sheberligi,tabandylyǵy maǵan degen senimi bizdi álemdik arenaǵa jetkizdi.
- Sporttaǵy korrýpııa kesirinen ádiletsizdikke ushyradyńyz , osy jaıly tolyǵyraq aıtyp ótseńiz?
- Ádiletsizdik bizdiń elimizdegi sport arenasynda kezdesip turady. Kez kelgen sport túrinde ár sportshy óz mansabynda osyndaı jaǵdaılarmen betpe-bet kelýi múmkin. Bul dúnıege daıyn bolý kerek. Óıtkeni sport qazir tabys kózine aınalyp ketti. Korrýpııa arqyly kóptegen týrnırge joldama alatyndar bolady. Muny jasyra almaısyń, kózińmen kórgende janyńdy qynjyltady. Osyǵan uqsas jáıt ózimniń de basymnan ótken. Bolyp jatqan oqıǵalarǵa moıymastan sportta adaldyq pen ádilet ornaıdy dep senemin. Korrýpııa kóptegen talantty tunshyqtyrdy, bul meni óte qynjyltady. Eń bastysy – arenada jeńis týyn kótermeseń de esh moıymaý, tek alǵa júrý.
- Sport mansabyndaǵy eń qıyn kezeń, ýaqyt qaısy?
- Men úshin mansabymdaǵy eń qıyn kezeń sońǵy 3 jyl dep oılaımyn. Dál osy ýaqytta men áıelder ulttyq quramasyna endim. Osy kezden bastap túrli jarystar men oqý-jattyǵý jıyndaryna jıi baratyn boldym. Sportshy joly ońaı emes. Bul jolda qanshama kóz jasy men ter tógiledi. Sizder kórip júrgen bizdiń árbir kúlkimiz, jeńisimiz ben medalimiz «aısbergtiń beti» ǵana. Biz alǵa qoıǵan maqsattarymyz úshin áli talaı qıyndyqtardy eńserýimiz kerek . Men áli de elime jeńis ákelýim tıis dep bilemin. Men úshin bul – úlken jaýapkershilik.
- Jas sportshylarǵa berer aqyl-keńesińiz qandaı?
- Jas sportshylarǵa beretin bir ǵana keńesim bar. Bárin sabyrlyqqa jeńdirtý kerek, maqsatqa jetý men tártipke kóndigý hte mańyzdy. Osy 3 qasıettiń arqasynda men Azııa chempıony, Álem chempıonatynyń fınalısi atandym. Erte me, kesh pe, eńbek aqtalady. Tek tózimmen qaraı bilý qajet. Muny talaı ret álemdik deńgeıdegi tulǵalar dáleldedi. «Sabaqty ıne sátimen», maqsatqa jetý úshin talmaı eńbek et!
- Sporttan bólek nemen aınalysasyz? Bolashaqqa qoıǵan josparyńyz qandaı?
- Qazirgi sátte men álem chempıonatynan keıin demalyp jatyrmyn. Demalysymda densaýlyǵyma kóp kóńil bólemin jáne jan-jaqty damýǵa tyrysamyn. Naqtyraq aıtsam, qazir bımen, án shyrqaýmen, taýǵa shyǵýmen demalysótkizip jatyrmyn. Fızıkalyq jáne rýhanı demalystan keıin maqsatymyzǵa oralamyz. Alda 2028 jyly Los-Andjeleste ótetin Olımpıada kútip tur. Olımpıadada maqsatqa jetý úshin uzaq joldy, asqan qıyndyqty eńserý kerek. Biraq bizdi endi toqtaýǵa bolmaıdy. Baǵyndyrar bıik shyńymyz áli alda!
- Suhbatyńyzǵa rahmet!
Kamıla Altaeva
