ايەلدەر بوكسىنداعى جەڭىسكە جەتۋدىڭ جولى قانداي؟ چەمپيوناتتىڭ كۇمىس جۇلدەگەرى ءوز سۇحباتىندا وسى سالاداعى جاعدايدى سيپاتتايدى.
قازاقستاندىق سپورتشى ۆيكتوريا گرافەەۆا 8-17 ناۋرىزىندا نيشەدە وتكەن ايەلدەر بوكسىنان وتكەن الەم چەمپيوناتىندا كۇمىس جۇلدەگە قول جەتكىزدى.
ول ءوزىنىڭ سۇحباتىندا ايەلدەر ءۇشىن توسىنداۋ وسى سپورت تۇرىنە قالاي كەلگەنى جانە سپورتتا باستان كەشكەندەرى جايلى ويلارىمەن بولىسكەن.
- جەڭىل اتلەتيكادان بوكسقا كەلۋىڭە نە سەبەپ بولدى؟
- جەڭىل اتلەتيكادان كەلۋىمە جاراقات الۋىم سەبەپ بولدى. بوكسقا 17 جاسىمدا انامنىڭ قالاۋىمەن كەلدىم. وعان دەيىن ەشقاشان سپورتتىڭ جەكپە-جەك تۇرىنە كەلەم دەپ ويلاماپپىن. اياق باسپايمىن دەپ ويلاپ ەدىم. تۇراقتى تۇردە ءبىر سپورت تۇرىمەن شۇعىلدانباۋىم انامنىڭ مەنى وقۋشىلار سارايىنا جەتەلەپ اپارۋىنا تۇرتكى بولدى.
- الەم چەمپيوناتىنىڭ شارشى الاڭىنا شىعۋ سىزگە قانداي اسەر قالدىردى؟
- الەم چەمپيوناتىنان العان اسەرىمدى سوزبەن جەتكىزۋ قيىن. ءاربىر سپورتشى ءۇشىن الەمدىك ارەناعا شىعۋ – بيىك دارەجە. بۇل تۋرنير ءۇشىن مەن كوپ قيىن دايىندىقتاردان ءوتتىم. سول ساتتە ۇلكەن رينگتە ۇلكەن اۋديتوريا مەن جانكۇيەردىڭ ءۇمىت-سەنىمىن سەزىندىم جانە بۇل ماعان شابىت بەردى. وسى تاجىربيەدەن كەيىن مەن ءوزىمدى سەنىمدى سەزىندىم. مەنىڭ ويىمشا، ءاربىر سپورتشى وسىنداي جارىستاردان ءوتۋى ءتيىس. سوندا عانا ول ءبىرتۋار تۇلعاعا جانە مىقتى سپورتشىعا اينالا الادى.
- العاشقى باپكەرىڭىز، سپورتقا كەلۋىڭىز جايلى ايتىپ بەرسەڭىز؟
- مەنىڭ العاشقى جانە وسى كۇنگە دەيىنگى جالعىز باپكەرىم – نۇرلان مۇحامبەتقاليەۆ. 2017 جىلى اتا-انام وقۋشىلار سارايىنا الىپ كەلگەندە وزگە باپكەرلەر سىڭىلىم ەكەۋمىزدى «تىم كەش كەلدىڭدەر» دەپ قابىلداماعان ەدى . بىراق نۇرلان اعاي ءبىزدى وزىنە الىپ، سەنىم ارتتى. ءبىزدىڭ بويىمىزدان ءوزىمىز بايقاماعان قاسيەتتى كوردى. اعايىمنىڭ شەبەرلىگى،تاباندىلىعى ماعان دەگەن سەنىمى ءبىزدى الەمدىك ارەناعا جەتكىزدى.
- سپورتتاعى كوررۋپتسيا كەسىرىنەن ادىلەتسىزدىككە ۇشىرادىڭىز ، وسى جايلى تولىعىراق ايتىپ وتسەڭىز؟
- ادىلەتسىزدىك ءبىزدىڭ ەلىمىزدەگى سپورت ارەناسىندا كەزدەسىپ تۇرادى. كەز كەلگەن سپورت تۇرىندە ءار سپورتشى ءوز مانسابىندا وسىنداي جاعدايلارمەن بەتپە-بەت كەلۋى مۇمكىن. بۇل دۇنيەگە دايىن بولۋ كەرەك. ويتكەنى سپورت قازىر تابىس كوزىنە اينالىپ كەتتى. كوررۋپتسيا ارقىلى كوپتەگەن تۋرنيرگە جولداما الاتىندار بولادى. مۇنى جاسىرا المايسىڭ، كوزىڭمەن كورگەندە جانىڭدى قىنجىلتادى. وسىعان ۇقساس ءجايت ءوزىمنىڭ دە باسىمنان وتكەن. بولىپ جاتقان وقيعالارعا مويىماستان سپورتتا ادالدىق پەن ادىلەت ورنايدى دەپ سەنەمىن. كوررۋپتسيا كوپتەگەن تالانتتى تۇنشىقتىردى، بۇل مەنى وتە قىنجىلتادى. ەڭ باستىسى – ارەنادا جەڭىس تۋىن كوتەرمەسەڭ دە ەش مويىماۋ، تەك العا ءجۇرۋ.
- سپورت مانسابىنداعى ەڭ قيىن كەزەڭ، ۋاقىت قايسى؟
- مەن ءۇشىن مانسابىمداعى ەڭ قيىن كەزەڭ سوڭعى 3 جىل دەپ ويلايمىن. ءدال وسى ۋاقىتتا مەن ايەلدەر ۇلتتىق قۇراماسىنا ەندىم. وسى كەزدەن باستاپ ءتۇرلى جارىستار مەن وقۋ-جاتتىعۋ جيىندارىنا ءجيى باراتىن بولدىم. سپورتشى جولى وڭاي ەمەس. بۇل جولدا قانشاما كوز جاسى مەن تەر توگىلەدى. سىزدەر كورىپ جۇرگەن ءبىزدىڭ ءاربىر كۇلكىمىز، جەڭىسىمىز بەن مەدالىمىز «ايسبەرگتىڭ بەتى» عانا. ءبىز العا قويعان ماقساتتارىمىز ءۇشىن ءالى تالاي قيىندىقتاردى ەڭسەرۋىمىز كەرەك . مەن ءالى دە ەلىمە جەڭىس اكەلۋىم ءتيىس دەپ بىلەمىن. مەن ءۇشىن بۇل – ۇلكەن جاۋاپكەرشىلىك.
- جاس سپورتشىلارعا بەرەر اقىل-كەڭەسىڭىز قانداي؟
- جاس سپورتشىلارعا بەرەتىن ءبىر عانا كەڭەسىم بار. ءبارىن سابىرلىققا جەڭدىرتۋ كەرەك، ماقساتقا جەتۋ مەن تارتىپكە كوندىگۋ ھتە ماڭىزدى. وسى 3 قاسيەتتىڭ ارقاسىندا مەن ازيا چەمپيونى، الەم چەمپيوناتىنىڭ ءفيناليسى اتاندىم. ەرتە مە، كەش پە، ەڭبەك اقتالادى. تەك توزىممەن قاراي ءبىلۋ قاجەت. مۇنى تالاي رەت الەمدىك دەڭگەيدەگى تۇلعالار دالەلدەدى. «ساباقتى ينە ساتىمەن»، ماقساتقا جەتۋ ءۇشىن تالماي ەڭبەك ەت!
- سپورتتان بولەك نەمەن اينالىساسىز؟ بولاشاققا قويعان جوسپارىڭىز قانداي؟
- قازىرگى ساتتە مەن الەم چەمپيوناتىنان كەيىن دەمالىپ جاتىرمىن. دەمالىسىمدا دەنساۋلىعىما كوپ كوڭىل بولەمىن جانە جان-جاقتى دامۋعا تىرىسامىن. ناقتىراق ايتسام، قازىر بيمەن، ءان شىرقاۋمەن، تاۋعا شىعۋمەن دەمالىسوتكىزىپ جاتىرمىن. فيزيكالىق جانە رۋحاني دەمالىستان كەيىن ماقساتىمىزعا ورالامىز. الدا 2028 جىلى لوس-اندجەلەستە وتەتىن وليمپيادا كۇتىپ تۇر. وليمپيادادا ماقساتقا جەتۋ ءۇشىن ۇزاق جولدى، اسقان قيىندىقتى ەڭسەرۋ كەرەك. بىراق ءبىزدى ەندى توقتاۋعا بولمايدى. باعىندىرار بيىك شىڭىمىز ءالى الدا!
- سۇحباتىڭىزعا راحمەت!
كاميلا التاەۆا
