Sporttyq gımnastıkadan Qazaqstan quramasynyń ókili Mılad Karımı Horvatııanyń Osıek qalasynda ótip jatqan Álem kýbogynyń kezeńinde jeńiske jetti. Bul týraly 13 sáýirde Ulttyq olımpıadalyq komıtettiń baspasóz qyzmeti jazdy, dep habarlaıdy «Adyrna» tilshisi.
Otandasymyz kermedegi jattyǵý baǵdarlamasynyń fınalynda qarsylastaryna des bermedi.
Karımı tóreshilerdiń sheshimimen 14.666 upaı jınady. Osylaısha bul Álem kýbogynyń kezeńinde ekinshi júldesine qol jetkizdi. Ol buǵan deıin erkin jattyǵýlarda úshinshi oryn ıelengen edi.
Fınalda ekinshi oryndy Izraıl sportshysy Aleksandr Mıakının (14.433), al qytaılyq Chenı Se (14.300) úshinshi nátıje kórsetti.
Aıta keteıik, Osıekte ótken jarysta Qazaqstan quramasy úsh júlde jeńip aldy. Karımıden bólek Narıman Qurbanov ta júldeger atanyp, at snarıadynda ótken jattyǵýlarda qola medal jeńip aldy.
