Prezıdent Qasym-Jomart Toqaev elordadaǵy birqatar nysandy aralap kórdi. Bul týraly búgin, 6 qańtarda Aqordanyń baspasóz qyzmeti jazdy, dep habarlaıdy «Adyrna» tilshisi
Memleket basshysy, eń aldymen, Kazakhstan International School Astana (KIS Astana) mektebine bardy. 20 myń sharshy metrden astam aýmaqta ornalasqan bilim berý mekemesi 800 oqýshyǵa jáne mektep jasyna deıingi 120 balaǵa eseptelgen. Mektep halyqaralyq bakalavrıat (IB) akkredıtaııasynan ótken. Bul bedeldi baǵdarlama úsh baǵytty qamtıdy. Atap aıtqanda, 5-ten 10 jasqa deıingi balalarǵa arnalǵan bastaýysh (Primary Years Programme, PYP), 11-den 16 jasqa deıingi balalarǵa eseptelgen orta (Middle Years Programme, MYP) jáne 16-19 jas aralyǵyndaǵy eresek oqýshylarǵa beıimdegen dıplomdyq oqý baǵdarlamasy (Diploma Programme, IB) bar.
Memleket basshysy Qazaqstanda bilim berý deńgeıin arttyrýdyń mańyzdy ekenin atap ótti. Ásirese, jas býynnyń básekege qabiletin shyńdaýda ári jan-jaqty damytýda osyndaı oqý oryndary erekshe ról atqaratynyna nazar aýdardy.
Sondaı-aq Qasym-Jomart Toqaev QazSwimAcademy sport ortalyǵynyń jumysymen tanysty. Ortalyq dırektorynyń aıtýynsha, biregeı keshende sportshylardy daıarlaýǵa qajetti barlyq jaǵdaı jasalǵan. Eresekter men balalar uzyndyǵy ártúrli bes basseınde jattyǵa alady. Onyń biri 50 metrlik bolsa, ekeýi 25 metrlik jáne ekeýi 10 metrlik júzý jolaqtary bar basseınder. Toptyq jattyǵýlar 25 baǵyt boıynsha júrgiziledi. Sonymen qatar munda kásibı jattyǵý zaly da bar.
Prezıdent jas sportshylarmen áńgimelesip, memleket sport ınfraqurylymdaryn damytýǵa erekshe mán beretinin aıtty.
– Keleshekte tabysty bolýlaryńyzǵa jáne olımpıada chempıony atanýlaryńyzǵa tilektespin. Sporttyń densaýlyqty jaqsartýda, sondaı-aq halyqaralyq jarystarda elimizdiń dańqyn shyǵarýda mańyzy óte zor. Sizderdiń jeńimpaz sportshy ári elimizdiń laıyqty azamaty bolatyndaryńyzǵa senemin, –dedi ol.
