Táýelsizdik kúni qarsańynda Almaty oblysynyń Raıymbek aýdanynda jastar úshin arnaıy boı kótergen kovorkıng ortalyq qoldanysqa berildi.
Bul aýdan halqynyń úshten birin quraıtyn Raıymbek jastary úshin kópten kútken qýanyshty oqıǵa boldy. Zamanaýı nysan jastardyń jan-jaqty damýyna, bos ýaqytyn tıimdi ótkizýine, qajetti aqparat alýyna múmkindik beretin ortalyqqa aınalmaq.
Sondaı-aq, jastarǵa bilikti mamandar psıhologııalyq jáne zańgerlik kómek, qarjylyq saýattylyq boıynsha keńes berip, jumysqa ornalasýyna qoldaý kórsetedi.
Aıta ketý kerek, jastar ortalyqtary jyl basynan beri oblys ákiminiń qoldaýymen Qonaev qalasynda jáne Balqash, Kegen aýdanynda iske qosyldy, keler jyly Qaskeleń qalasynda ashylady.
«Qazir Almaty oblysynda 14 pen 35 jas aralyǵyndaǵy 420 myńnan astam jas turady. Biraq jastar úshin bas qosyp oı bólisetin, qıyn kezde kómek kórsetetin ortalyq oblys aımaǵynda bolǵan emes. Biz qazir bul máseleni júıeli jáne kezeń-kezeńimen sheship jatyrmyz. Aldaǵy ýaqytta biz oblystyń basqa aýdandarynda jastar úshin zamanaýı ınfraqurylym qurýǵa tyrysamyz. Bul óz kezeginde jastarmen júıeli jumys júrgizýge yqpal etedi», - dedi oblystyq jastar saıasaty máseleleri jónindegi basqarma basshysy Mádı Ahmetov.
Kovorkıng ortalyqtar óńirdegi jastardy áleýmettendirýdiń mańyzdy quralyna aınalyp keledi. Jastardyń jańa alańynda tegin negizde bıznes-trenıngter, sheberlik sabaqtary, kezdesýler, kórmeler, úıirmeler jáne basqa da is-sharalar ótkizý josparlanýda.
