Astanada qatty jeldiń saldarynan munaraly kran qulady. Bul oqıǵa «Rıo-de-Janeıro» turǵyn úı kesheniniń qurylys alańynda boldy, dep habarlaıdy "Adyrna" ulttyq portaly Tengrinews-ke silteme jasap.
Qazaqstannyń Tótenshe jaǵdaılar mınıstrliginiń Ónerkásiptik qaýipsizdik komıtetiniń málimetine sáıkes, krannyń qulaýy jeldiń kúrt kúsheıýi men ýaqytynda bekitilmeýinen bolǵan.
«Saryarka aýdanynda, Sultan Beıbarys kóshesi, 25/4 mekenjaıynda ornalasqan "Rıo-de-Janeıro" qurylys alańynda (jalpy merdigeri G-park JShS) daýyldy jeldiń áserinen KB-405 markaly kran qulady. Qurbandar men jaraqat alǵandar joq. Oqıǵa ornyna departament ınspektorlary jiberildi. Aldyn ala sebebi – jeldiń kúrt kúsheıýi men krannyń ýaqytynda bekitilmeýi», - delingen TJM Ónerkásiptik qaýipsizdik komıtetiniń bergen málimetinde.
Resmı derekter boıynsha, oqıǵany tergeý úshin arnaıy komıssııa qurylýda.
