Qarjylyq monıtorıng agenttiginiń departamenti Almaty oblysynyń prokýratýrasymen birlese otyryp, «Shańyraq» qoǵamdyq birlestiginiń basshysy Almasbek Sadyrbaıdy ustady. Ol 1,2 mıllıard teńge kóleminde zańsyz sýbsıdııa alǵany úshin kúdikke ilindi, dep habarlaıdy «Adyrna» ulttyq portaly QMA baspasóz qyzmetine siltep.
QMA málimetinshe, Almasbek Sadyrbaı Balqash, Eńbekshiqazaq, Kegen, Raıymbek jáne Uıǵyr aýdandarynda jalǵan aýylsharýashylyq kooperatıvterin qurǵan adamdar tobyn basqarǵan.
"Negizgi maqsat – qoı-eshki mal basyn uryqtandyrýǵa sýbsıdııalar men azyq shyǵyndaryn óteýge zańsyz sýbsıdııalar alý. Osy úshin aýyl sharýashylyǵy jerleri joq bolsa da, sharýashylyqtar zańsyz tartylǵan. Keıin sýbsıdııa alýǵa jalǵan málimetterdi, sonyń ishinde jalǵan kadastrlyq nómirlerdi kórsetip, qashyqtan ótinishter berilgen. Bul rette aýylsharýashylyq kooperatıvteriniń basshylarynyń EQ-syn olardyń kelisiminsiz qoldanǵan", – dep málimdedi QMA.
«Shańyraq» qoǵamdyq birlestiginiń basshysy asa iri kólemdegi alaıaqtyq jasady degen kúdikpen ustaldy. Onyń sybaılasy sot sankııasymen úıqamaqqa alyndy.
Osydan úsh kún buryn Almasbek Sadyrbaı Almaty oblysynda «bespredel» dep, ózine qysym jasalyp jatqanyn aıtyp, prezıdentke úndeý jasaǵan edi. Iýtýb jelisinde jarııalanǵan vıdeo osy ýaqyt ishinde 65 myńnan astam qaralym jınaǵan. Jeli qoldanýshylary Almasbek Sadyrbaıdy qoldaıtyndaryn aıtyp pikir qaldyrýda.
