Abaı oblysynyń ákimi Nurlan Uranhaev oblys ákimderiniń reıtıngine qatysy joq ekenin aıtty, dep habarlaıdy «Adyrna» tilshisi.
Ortalyq kommýnıkaııalar alańyndaǵy jıynda «Jýyrda 17 oblys pen úsh megapolıstiń ákimderiniń reıtıngisi shyqty. Atalǵan reıtıngte siz birinshi orynda kósh bastap tur ekensiz. Jalpy mundaı reıtıngter «Arnaıy tapsyryspen jasalady» degen boljam aıtylady. Reıtıng boıynsha birinshi oryn alýyńyz arnaıy tapsyrys emes pe? Jalpy ózińizdi úzdik ákim dep esepteısiz be?» dep ákimge suraq qoıyldy.
Nurlan Telmanuly ózin úzdik ákim sanamaıtynyn eskertti.
«Men úshin mundaı reıtıngtiń bolǵanynan bolmaǵany jaqsy. Sebebi osyndaı suraqtar týyndamaıdy. Men eshqashan ózimdi de, basqa áriptesterimdi de menen jaqsy nemese kem dep oılamaımyn. Óıtkeni biz osy reıtıng úshin jumys jasamaımyz, kim ne dese halyqtyń baǵasy eń mańyzdy. Shákárimniń «Mansaptyń taǵy úshin, maqtanǵa salynǵannan aýlaqpyn» degen dana sózi bar.
Shynyn aıtýym kerek, osy laýazymda júrmin, barmyn. Menimen qatar, teń júrgen áriptesterimnen men artyqpyn degen jumysqa barmadym jáne barmaımyn da. Reıtıng týraly baspasóz hatshymnan «Mynaý qaıdan shyǵyp jatyr, kim ony jasap jatyr?» dep birneshe ret suraǵanmyn. Men mundaı reıtıngterdi bilmeımin. Erteń dál osyndaı reıtıng shyǵatyn bolsa, men oǵan da qaramaımyn. Men ózimdi birinshi dep eseptemeımin», – dedi oblys ákimi.
