اباي وبلىسىنىڭ اكىمى نۇرلان ۇرانحاەۆ وبلىس اكىمدەرىنىڭ رەيتينگىنە قاتىسى جوق ەكەنىن ايتتى، دەپ حابارلايدى «ادىرنا» ءتىلشىسى.
ورتالىق كوممۋنيكاتسيالار الاڭىنداعى جيىندا «جۋىردا 17 وبلىس پەن ءۇش مەگاپوليستىڭ اكىمدەرىنىڭ رەيتينگىسى شىقتى. اتالعان رەيتينگتە ءسىز ءبىرىنشى ورىندا كوش باستاپ تۇر ەكەنسىز. جالپى مۇنداي رەيتينگتەر «ارنايى تاپسىرىسپەن جاسالادى» دەگەن بولجام ايتىلادى. رەيتينگ بويىنشا ءبىرىنشى ورىن الۋىڭىز ارنايى تاپسىرىس ەمەس پە؟ جالپى ءوزىڭىزدى ۇزدىك اكىم دەپ ەسەپتەيسىز بە؟» دەپ اكىمگە سۇراق قويىلدى.
نۇرلان تەلمانۇلى ءوزىن ۇزدىك اكىم سانامايتىنىن ەسكەرتتى.
«مەن ءۇشىن مۇنداي رەيتينگتىڭ بولعانىنان بولماعانى جاقسى. سەبەبى وسىنداي سۇراقتار تۋىندامايدى. مەن ەشقاشان ءوزىمدى دە، باسقا ارىپتەستەرىمدى دە مەنەن جاقسى نەمەسە كەم دەپ ويلامايمىن. ويتكەنى ءبىز وسى رەيتينگ ءۇشىن جۇمىس جاسامايمىز، كىم نە دەسە حالىقتىڭ باعاسى ەڭ ماڭىزدى. شاكارىمنىڭ «مانساپتىڭ تاعى ءۇشىن، ماقتانعا سالىنعاننان اۋلاقپىن» دەگەن دانا ءسوزى بار.
شىنىن ايتۋىم كەرەك، وسى لاۋازىمدا ءجۇرمىن، بارمىن. مەنىمەن قاتار، تەڭ جۇرگەن ارىپتەستەرىمنەن مەن ارتىقپىن دەگەن جۇمىسقا بارمادىم جانە بارمايمىن دا. رەيتينگ تۋرالى ءباسپاسوز حاتشىمنان «مىناۋ قايدان شىعىپ جاتىر، كىم ونى جاساپ جاتىر؟» دەپ بىرنەشە رەت سۇراعانمىن. مەن مۇنداي رەيتينگتەردى بىلمەيمىن. ەرتەڭ ءدال وسىنداي رەيتينگ شىعاتىن بولسا، مەن وعان دا قارامايمىن. مەن ءوزىمدى ءبىرىنشى دەپ ەسەپتەمەيمىن»، – دەدى وبلىس اكىمى.
