«Amanat» partııasy frakııasynyń jetekshisi Elnur Beısenbaev Ónerkásip jáne qurylys mınıstri Qanat Sharlapaevqa aýyz sýǵa baılanysty suraq qoıdy, dep habarlaıdy "Adyrna" ulttyq portaly.
«2025 jyly memleket basshysy búkil aýyl men eldimekendi 100 paıyz aýyz sýmen qamtamasyz etýdi tapsyrdy. Bıylǵy bıýdjettik jobada bólinetin qarajatty esepke alatyn bolsaq, memleket basshysynyń bul tapsyrmasy ýaqytyly oryndalmaıtyn túri bar. Biz barlyq aýyldardy esepke alyp, 80 mıllıardqa jýyq qarajatty «Amanat» partııasy atynan arnaıy otyrǵyzdyq. Sonyń ózinde bul bıýdjettiń jobasynda sizder 15 mıllıard qarajatty qoldap otyrsyzdar. Sondaı-aq keıbir óńirler tipti memleket basshysynyń tapsyrmasyn ysyryp qoıyp, jobalyq-smetalyq qujattaryn jasamaǵan. Iaǵnı, bul úkimet tarapynan baqylaýdyń áilsizdigi dep esepteımin. Ne olar daıyndamaǵan, ne memleket basshysynyń tikeleı tapsyrmasy 5 myń halyqtan asatyn turǵyny bar aýyldardyń barlyǵy sýsyz qalýy kerek?
Budan bólek Joǵary palatanyń esebi boıynsha sýy jetkizilgen aýyldardyń shamamen 13 paıyzy qazir qaıta jóndeýdi qajet etedi. Iaǵnı, olarda sý jetispeıdi. Túrkistan men Soltústik Qazaqstan oblysy sekildi 7 óńirde áli kúnge deıin arbamen sý iship otyrǵan adamdar bar.
Sol sebepten osy jobany aıaqtaý josparlaryńyzda bar ma? Eger de bul jobany 2025 jyly sizder shamamen 100 mıllıard teńge qarjy bólip, memleket basshysynyń tapsyrmasyn tolyǵymen aıaqtamasańyzdar bul máselede jaýapkershilikti kim moınyna alady?», – dedi Májilis depýtaty.
Qanat Sharlapaevtyń aıtýynsha, aýyz sýmen qamtamasyz etý máselesi mınıstrdiń basty baqylaýynda.
«Qazirgi tańda bıýdjettiń jobasynda 79 mıllıard teńge kózdelgen. Bul 116 jobany iske asyrýǵa jetedi. Depýtattardyń qoldaýymen taǵy 15 mıllıard qosyldy. Osy qarajatty 106 jobaǵa bóletin bolamyz. Árıne basqa qarajat kózderin izdeý qajet bolady. Prezıdenttiń tapsyrmasyn árıne oryndaımyz. Eń aldymen 2025 jyldyń bıýdjetin naqtylaý kezinde osy máseleni taǵy qarastyratyn bolamyz. Al jobalyq-smetalyq qujat boıynsha birneshe óńirler keshigip kele jatyr. Osy jumystar jeke baqylaýymda. Apta saıyn osy boıynsha jumystar júrgizip jatyrmyz. Osy jyldyń sońyna deıin jobalyq-smetalyq qujat daıyn bolady dep oılaımyz. Osy máseleniń mańyzdylyǵyn bárimiz túsinemiz. Keleshekte Qarjy mınıstrligimen birge basqa kózden qarajat qarastyramyz. Prezıdenttiń tapsyrmasy 2025 jyldyń sońyna deıin aıaqtaıtyn bolamyz», – dedi ol.
Búgin Májilistiń jalpy otyrsyna Úkimet basshysy Oljas Bektenov bastaǵan mınıstrler kabınetiniń músheleri túgel keldi. Májilistiń kún tártibinde QR Ulttyq qorynan 2025 – 2027 jyldarǵa arnalǵan kepildendirilgen transfert týraly» Qazaqstan Respýblıkasy Zańynyń jobasy qaralyp jatyr.
