Ulytaý oblysynyń ákimi Berik Ábdiǵalıuly Jezqazǵandaǵy JBB №24 mektepte ornalasqan №213 ýchaskege kelip, óz tańdaýyn jasady.
Óńir basshysy referendýmnyń mańyzyna toqtaldy.
«Referendým - «Estýshi memleket» tujyrymdamasynyń aıasynda halyq únine qulaq asý úshin uıymdastyrylyp otyrǵan aýqymdy is-shara. Qazaqstandaǵy barlyq turǵyn búgin daýys berý múmkindigine ıe bolyp jatyr. Men de óz elimniń erkin azamaty retinde ýchaskege kelip, el erteńine beı-jaı qaramaıtyn jerlesterimmen birge daýys berdim», - dedi óńir basshysy Berik Ábdiǵalıuly óz sózinde.
Jalpy Ulytaý oblysy boıynsha 132 referendým ýchaskesi, onyń ishinde azamattardyń 4 ýaqytsha kelý ýchaskeleri jumys isteıdi. 870 aýmaqtyq jáne ýchaskelik referendým komıssııasynyń múshesi qyzmet atqarýda. Oblys qalalaryndaǵy 21 ýchaskede saılaýshylar tiziminde azamattardy tekserý boıynsha onlaın-servıster jáne 6 ýchaskede azamattardy tirkeý boıynsha servıster ornatyldy.
Erekshe qajettilikti talap etetin 336 adam úshin daýys berý jaǵdaılaryn qamtamasyz etý boıynsha referendým zańnamasy sheńberinde jaǵdaılar jasaldy. Onyń ishinde kreslo-arbalardy paıdalanatyn 157, zaǵıp jáne nashar kóretinderi -108, estý qabileti boıynsha múgedektigi bar – 71 adam. Barlyq ýchaske pandýstarmen jáne tutqalarmen, tıisti buryshtarmen jáne daýys berý úshin qajetti quraldarmen jabdyqtalǵan.
Múgedekter arbasyn paıdalanatyn adamdar úshin ýchaskelerde eriktilerdiń kómegi kózdeletin bolady. Referendým kúni oblystyń qalalarynda 6 ınvataksı qyzmet kórsetedi.
