Belgili aıtysker aqyn Muhamedjan Tazabek Instagram jelisindegi paraqshasynda kóp áıel alý jaıly oıyn aıtty, dep habarlaıdy «Adyrna» tilshisi.
«Kóp áıeldilik - Alla ruqsat bergen, biraq jaýapkershiligi óte zor sheshim. Eń keregi - ádildik. Sodan soń sabyr, qarajat, danalyq, bilim, densaýlyq qajet. Adam sapasy ketken qoǵamda otbasynyń da sapasy ońaı bolmaı tur. Ótirik kúlip, ishteı jylap júrgen áıel de, erkek te jetedi. Áıel tabamyn-aý, biraq ózimnen ádildik tabamyn ba? Kúıeý tabasyń-aý, bireý taǵdyryńa súıeý tabasyń ba? Taǵdyr degen, násip degen nárse bar... Eldiń bári sultan Súleımen emes, Súleımenniń bárine Hıýrrem sultan násip bola bermeıdi. «Qansha sý mı bolsa da, sýsar bórik tazda bar» dep Esenqul aqyn aıtqandaı keıde japalaq jarǵanatqa úılenip, keıde jylan altyndy qushaqtap jatady. Ómir ǵoı. Ár otbasy - jeke synaq, dara jaýapkershilik. Mende bul jaǵynan synaq bireý. Ne bolsa da basqa jar ala almadym. Alla boıdaqtardy otbasyly etip, barlyq otbasylarǵa yntymaq, bereke, izgilik násip etsin! Kimge qandaı taǵdyr násip etse de, eń bastysy erkekter ezilmesin, áıelder qorlanbasynshy»,— dedi ol.
Jeli qoldanýshylary Muhamedjan Tazabekke «Qansha áıelińiz bar?» degen saýal joldady.
«Áıelderdi qýantqan taǵdyrym bar»,—dep jaýap berdi aıtysker aqyn.
