Qazaqstannyń Birikken Arab Ámirlikterindegi elshisiniń keńesshisi áıelin 10 jyl boıy azaptap, uryp-soqqany aıtyldy. Bul týraly qazaqstandyq dıplomattyń áıeli Karına Mamash jelide beıneúndeý jarııalady, dep habarlaıdy “Adyrna” ulttyq portaly.
"Men, Mamash Karına Gosmanqyzy, BAÁ-degi elshiniń keńesshisi Mamash Sáken Táshkenbaıulynyń jubaıymyn. 10 jyl boıy zorlyq-zombylyqqa ushyrap kelemin. Maǵan kórsetken búkil qorlyǵy – onyń ishinde fızıkalyq, seksýaldyq, emoıonaldyq, ekonomıkalyq, turmystyq zorlyq-zombylyq úshin kúıeýimdi dıplomat mártebesinen aıyryp, túrmege otyrǵyzǵanyn qalaımyn", - dedi Karına Mamash.
Karına 5 mamyr kúni kúıeýi oǵan jáne onyń ápkesine kúsh kórsetkenin de aıtty.
«NeMolchı» qorynyń jetekshisi Dına Tańsári prezıdentke, Ishki jáne syrtqy ister mınıstrlikterine úndeý jasady.
«Ishki ister mınıstrliginen Qazaqstannyń BAÁ-degi elshisiniń keńesshisi jasap otyrǵan áreketke aralasyp, áıelin kúıeýinen qorǵaýdy talap etemiz. Ol áıeli men onyń ápkesin uryp-soqqan.
Foto men vıdeo azaptaýdyń bolǵanyna dálel. Prezıdent Toqaevqa, IIM, SIM-ge resmı úndeý jasaımyz. Zorlyqshynyń ústinen qylmystyq is ashýdy talap etemiz! Vıdeoǵa qarańyzdar, Móldir Qabylova men Saltanat Núkenovanyń taǵdyry qaıtalanyp jatyr», - dedi qoǵam belsendisi.
Syrtqy ister mınıstrligi oqıǵaǵa qatysty jaýap berdi.
«Biz bul qyzmetkerdi shuǵyl túrde Qazaqstanǵa shaqyryp jatyrmyz, endi onyń isimen quqyq qorǵaý organdary aınalysady», - dedi QR Syrtqy ister mınıstrliginiń resmı ókili Aıbek Smadııarov.
