QR Mádenıet jáne aqparat mınıstri Aıda Balaeva dúnıejúzilik teatr kúnimen quttyqtady, dep habarlaıdy "Adyrna" portaly.
Balaeva teatr kúni merekesiniń ónersúıer maıtalmandary úshin mańyzdylyǵyn atady:
"Búgin búkil álem Teatr kúnin atap ótýde. Sóz joq, osynaý adamzat rýhanııatynyń bekzat óneri - qasıetti sahna qudyretin túsinetin árbir jan úshin erekshe mán men mańyzǵa ıe. Endeshe, barshańyzdy osy bir ataýly kúnmen shyn júrekten quttyqtaımyn! Kezinde Muhtar Áýezovtyń: “Teatr — symbatty ónerdiń ishindegi eń zory”, - degen áıgili sózi - osy kúni sany jyl sanap kóbeıe túsken teatral-qaýymnyń rýhanı talǵamyna berilgen bıik baǵa. Bul týraly teatr óneriniń eń úlken qamqorshysy retinde Memleket basshysynyń da nazar bólek, qoldaýy naqty. Atap aıtsaq, búginde elimizde 67 teatr jemisti eńbek etip kelse, onyń 22-si Táýelsizdik jyldarynda 22 ashylǵan. Osy ýaqyt ishinde 10 jańa ǵımarat salyndy. Úsh respýblıkalyq teatr «halyqtyq» mártebesin abyroımen arqalap júr, óńirlik teatrlar da damyp keledi, onyń beseýine «akademııalyq» mártebesi berildi. Bul salada 20 myńǵa jýyq teatr maıtalmany eńbek etse, onyń 19-y halyq ártisi ataǵyn alǵan, al 1 myńnan astamy «Qurmet», «Parasat» ordenderiniń jáne Qazaqstannyń eńbek sińirgen óner qaıratkerleri ataǵynyń ıegerleri" dedi ol.
Sondaı-aq, ol mádenıetimizdiń órleýinp úles qosyp júrgen barsha ártisterge alǵysyn aıtty:
"Shyn máninde, bul bizdiń ultymyzdyń eń qundy da qazynaly adamı áleýeti. Sondyqtan da men mádenıetimizdi saqtaýǵa jáne damytýǵa úles qosyp júrgen barsha óner ıelerine alǵys aıtamyn. Sizderdiń kúndelikti eńbekterińizdiń jemisin qoǵam sezinip, memleket qashan da qoldaıdy. Jańa atap ótkenimdeı, sońǵy jyldary halyqtyń teatrǵa degen qyzyǵýshylyǵy artyp kele jatyr. Repertýarlyq saıasattyń oń dınamıkasy men damýy baıqalady. Teatr repertýarynda búginde 2,5 myń spektakl bar. Ótken jyldyń ózinde 12 myńnan astam spektakl sahnalanǵan, ony 2,5 mıllıonnan astam kórermen tamashalady. Sondaı-aq 66 myńy shetelde gastroldik saparlarda qoıyldy. Mine, osynyń barlyǵynyń túbinde Sizderdiń - teatr maıtalmandarynyń eńbegi jatyr. Sizdiń ónerge adaldyqtaryńyzǵa, sheberlik pen talanttaryńyzǵa myń alǵys! Ónerlerińiz kópshiliktiń kóńilinen shyǵyp, jaqsylyqqa jarshy bola bergeısizder!
Dúnıejúzilik teatr kúni qutty bolsyn!" dep jazdy ol óziniń Facebook paraqshasynda.
