"Habar" arnasyndaǵy "Biraq..." baǵdarlamasy qoǵamdyq rezonans týdyrdy, dep habarlaıdy "Adyrna" ulttyq portaly belsendi Dına Elgezektiń postyna siltep.
"Habar" arnasy tikeleı efırde kórsetken "Biraq..." baǵdarlamasynyń turmystyq zorlyq-zombylyqtyń qurbany bolǵan áıel týraly shyǵarylymy kóptiń ashýyna tıdi.
Jýrnalıst, belsendi Dına Elgezektiń jazýynsha, baǵdarlama avtorlary "ishkish" kúıeýiniń tepkisine tózgen, jábirlenýshi áıeldi efırge aldap shyǵarǵan:
«Biraq» degen tok-shoý keshe jyldar boıy kúıeýinen taıaq jep, aqyrynda qolyn syndyrǵan soń alty balasymen ajyrasyp ketken áıeldi stýdııaǵa shaqyrdy. Áıel ajyrasqan soń Shymkentten Astanaǵa kóship kelgen. Úsh aı buryn kúıeýi olardyń Astanadaǵy úıin taýyp alyp, iship kelip taǵy shý shyǵarǵan. Sodan beri áıel balalarymen turmysta zábir kórgender panalaıtyn ortalyqta turyp júr. Osy ortalyqqa «Habardyń» jýrnalısteri habarlasyp, kúıeýinen taıaq jegen bir áıeldi taýyp berýdi suraıdy. Ortalyqtyń jetekshisi Anna Ryl «áıelge qarjylaı kómektesetinder tabylar» dep osy kisimen baılanystyrady. «Habardyń» tilshileri áıelge «Stýdııada kúıeýińiz bolmaıdy, túrińizdi kórsetpeımiz, maskada bolasyz» dep ýáde bergen soń, apaı tok-shoýǵa barýǵa kelisedi. Biraq tikeleı efır kezinde burynǵy kúıeýi stýdııaǵa kirip keledi. Áıelge qalaı qorlaǵanyn, qalaı taıaq jegenin júrgizýshiler taǵy aıtqyzady. Jylap otyryp aıtyp beredi. Kúıeýi «ótirik aıtpa, ótirik aıtpa» dep otyr. «Aq bolsań, maskańdy shesh, nege maskada otyrsyń?» dep tıisedi. Áıel «qyzym surady maska kııýdi» dese de, sheship tastaıdy" dep jazdy ol.
Baǵdarlama júrgizýshileri erli-zaıyptylardy tatýlastyrmaq bolǵan. Stýdııaǵa gúl aldyryp, kúıeýine bergizip, bitimge keltirmek nıette stýdııada otyrǵan sarapshylardy, nýmerolog, psıhologtardy sóıletedi. Olar juptyń bir-birin túsinisýi kerektigin aıtady. 19 jyl ǵumyryn kúıeýinen taıaq jeýmen ótkizgen áıeldiń sum taǵdyrǵa kónýin "mıǵa qonymsyz" dep atady kópshilik:
"Tok-shoý istedik dep máz shyǵarsyzdar, «Habardaǵy» áriptester. Keıipkerge bergen ýádede turmaı, etıkany buzǵandaryńyz — bólek áńgime. Sizder onsyz da ómir boıy aýyr psıhologııalyq travma alǵan, sodan emdelip júrgen adamdy qorlap, áıelge úlken qaýip tóndirdińizder. Jyldar boıy taıaq jep, kúıeýinen zábir kórgen adamnyń názik, sezimtal psıhıkasymen bulaı oınaıtyndaı sizder kimsizder? Tok-shoýdan soń áıel es jınaı almaı, uzaq jylady deıdi. Oǵan birdeńe bolsa, jaýap beresizder me?! «Habardaǵy» (erkek) júrgizýshi efır kezinde «Turmystaǵy zorlyqqa áıeldiń ózi jetkizetin shyǵar, múmkin shydaý kerek shyǵar?» degendeı suraq qoıady. Sarapshy retinde shaqyrylǵan nýmerolog (!) «erkekke erkeleý kerek, aldyna túsip almaý kerek» degendeı aqyl aıtady. Basqalar da áıeldi tatýlasýǵa shaqyrady. Aıta berseń kóp... «Habar», tok-shoý istemeı-aq qoıshy" dep qosty Dına Elgezek.
Atalmysh shyǵarylymǵa qoǵam belsendisi, prodıýser Perızat Myrzahmet te pikir bildirdi. Ol baǵdarlamany "Bıshimbaev sııaqtylardy aqtaýǵa arnalǵan joba" dep jazdy óziniń ınsta-storısinde:
"Habar arnasynyń "Biraq" degen tok-shoýy, prodıýserleri, redaktorlary, júrgizýshileri qanshama áıeldiń betine túkirdi. Reıtıng úshin arzan ádiske barý, jany jaraly áıeldi, balalardy qorlaý - elimizdegi jýrnalıstıkanyń aıqyn beınesi. Ádettegideı tok-shoý emes "boq-shoý" ekenderin dáleldedi. Bul Bıshimbaev sııaqtylardy qoldaýǵa arnalǵan joba. Sotpen qatar efırge shyǵýynyń ózi búkil senarııdi ashyp tur" dep jazdy ol.
Rezonansqa qatysty «Habar» Agenttigi» AQ basqarma tóraǵasy Kemelbek Oıshybaev keıipkerlerden, halyqtan keshirim surady:
"Bizdiń arnadaǵy jańadan efırge shyǵa bastaǵan «Biraq...» áleýmettik tok-shoýyna qatysty kóńil bólip, ún qosyp jatqandaryńyzǵa rahmet. Bir nárseni túsindire keteıik. «Biraq...» baǵdarlamasynyń efırge shyqqanyna 2 kún ǵana boldy. Jobanyń basty maqsaty – qoǵamdy alańdatyp otyrǵan áleýmettik máseleler, turmystyq zorlyq-zombylyq, otbasylyq qundylyqtar jáne basqa ózekti máselelerdi kótere otyryp, spıkerler, psıhologtar, zańgerler men basqa da sala mamandarymen birlesip, talqylaý jáne sheshý joldaryn izdeý. Keshegi efırde bir otbasynyń máselesin kórsetý arqyly, múmkindiginshe erli-zaıyptylardy tatýlastyryp jiberýdi kózdegen edik. Ókinishke qaraı, bul múmkin bolmady. Sondyqtan bizdiń baǵdarlamaǵa qatysqan keıipkerlerden de, kórermennen de keshirim suraımyz. Aldaǵy ýaqytta da qoǵamdaǵy ózekti máselelerden tys qalmaımyz degen oıdamyz" dep jazdy ol.
