Қазақстанда электронды үкімет порталы түбегейлі жаңартылмақ, деп хабарлайды "Адырна" ұлттық порталы.
Жаңа форматта eGov порталы жасанды интеллектке негізделіп, ChatGPT қағидаты бойынша жұмыс істейтін болады.
Премьер-министрдің орынбасары – цифрлық даму, жасанды интеллект және аэроғарыш өнеркәсібі министрі Жасұлан Мәдиевтің айтуынша, жаңартылған eGov азаматтарға мемлекеттік қызметтерді диалог арқылы алуға мүмкіндік береді. Енді пайдаланушыларға қажетті бөлімді іздеп, бірнеше форма толтырып, анықтамаларды қолмен тіркеудің қажеті болмайды.
«eGov-тың келесі даму кезеңі – азаматтарға ChatGPT қағидатымен толыққанды қызмет көрсету, яғни end-to-end шешім ұсыну. Басқаша айтқанда, жасанды интеллектпен қарым-қатынас арқылы бірден дайын мемлекеттік қызмет алу. Қазір бұл өнім әзір, алдағы апталарда тестілеу басталады», – деді министр.
Министрдің сөзінше, жүйені кең ауқымда іске қосу 2026 жылға жоспарланып отыр.
