20 наурыздан бастап Өскемен қаласындағы мемлекеттік органдар мен бюджеттік ұйымдар жаңа жұмыс кестесіне көшеді, деп хабарлайды "Адырна" ұлттық порталы.
Бұл туралы қала әкімдігінде өткен жиында Шығыс Қазақстан облысы әкімінің орынбасары Дархан Сапанов мәлімдеді.
Жаңа кестеге сәйкес, енді жұмыс күні сағат 08:00-де басталып, 17:30-да аяқталады, ал түскі үзіліс 12:00-ден 13:30-ға дейін белгіленді.
Бұл өзгеріс облыстың барлық қала және ауданында енгізіліп, тұрғындардың өмір сүру сапасын жақсартуға ықпал етеді деп күтілуде.
Жаңа жұмыс уақытына көшу мәселесі бойынша өткен жиынға мемлекеттік ұйымдардың өкілдерін қоса алғанда, 300-ге жуық адам қатысты. Қатысушылар жаңа кестенің тиімділігін атап өтіп, бұл шешімді қолдайтындарын білдірді.
Өскемен – Шығыс Қазақстан облысында жаңа жұмыс режимін енгізген соңғы қала болды.
Шығыс Қазақстан облысындағы барлық 11 ауданның жаңа жұмыс кестесіне ауысқаны туралы жазған едік.
