Ресейдің «Литературная газета» баспасында Сауытбек Әбдірахмановтың «Корифей» атты кітабы жарық көрді. Бұл кітап Қазақстанның Еңбек Ері, халық жазушысы Әбіш Кекілбаевтың шығармашылығына арналған, деп хабарлайды “Адырна” ұлттық порталы.
Әбіш Кекілбаев барлық әдеби жанрларда классикалық шығармалар жазып, оқырмандарын көркемдігімен, терең ойлау қабілетімен таңдандырып, тәнті етті. Ол қиын кезеңде уақыт талабына сай саяси аренада болды, ел тәуелсіздігінің нығаюына айтарлықтай үлес қосып, халықтың зор құрметіне ие болды. Бұл кітапта жазушы, публицист, өнертанушы, саясаттанушы, тарихшы, әдебиеттанушы ретінде оның ерекше қырлары жан-жақты ашылған.
Сондай-ақ, бұл кітап Қазақстан мен Ресей арасындағы достық қарым-қатынасты нығайтқан айтулы тұлғаны танытуға бағытталған. Кітаптың алғы сөзі Қазақстан Республикасының Президенті Қасым-Жомарт Тоқаевтың жазған сөзімен басталады.
«Мен Қазақстанның көрнекті жазушысы, мемлекет қайраткері Әбіш Кекілбаевты айрықша атап өткім келеді. Ол – ерекше тұлға және классик жазушы, халқымыздың рухани өмірінде айрықша із қалдырған, еліміздің дамуына зор үлес қосқан тұлға.
Мен Әбіш Кекілбаевпен бірге жұмыс істедім және оны жақсы білетін адаммын. Ол нағыз ірі тұлға, жоғары рухани мәдениеті бар адам еді. Әбіш кекілбаев ешқашан біреу туралы жаман сөз айтпайтын, адамдарды бір-біріне қарсы қоймай, барлығына құрмет пен сүйіспеншілікпен қарайтын. Оған басқа өңірлерден де көп адам келіп, құрмет көрсету үшін және жай ғана сөйлесуге барушы еді. Оның үйі әрдайым ашық болатын.
Жазушымен болған кездесулерден кейін оның талантына табынғандар жаңа энергия мен ынта алып кететін. Ол ұсақ-түйек әңгімелерден алыс, тек адамзаттың өткенін, қазіргісі мен болашағын терең ой елегінен өткізетін. Бір сөзбен айтқанда, Әбіш Кекілбаев – үлкен интеллектуал, дана адам болатын», деді Президент.
Сондай-ақ, Мемлекет басшысы жазушының шығармашылығымен ертеден таныс екенін айтты.
“Әбіш Кекілбаев – халқымыздың ұлы ұлдарының бірі ретінде әлемге танытуға лайықты тұлға. Мен жазушының отбасында өстім, сондықтан мен үшін Әбіш Кекілбаевтың есімі ертеден таныс болды. Оның шығармаларымен де ерте таныстым. Маған терең құрметпен қараған Әбіш аға менің өмірімде көп жылдар бойы Сенатта бірге жұмыс істеп, жақын араласуға мүмкіндік берді. Біз бір-бірімізге зор құрметпен қарадық. Бұл жылдар менің өмірімдегі ең бақытты кезеңдерімнің бірі деп санаймын.
Ұлтының руханиятына өлшеусіз үлес қосқан ұлы тұлғаның есімі расында үлкен құрметке лайық. Оның жазушылық шеберлігі мен қоғамдық-саяси қызметін жан-жақты зерттеп, насихаттау қажет. Осы тұрғыда белгілі жұмыстар жүргізілуде.
Ол «Кекілбаевтану» («Кекильбаевоведение») атты тұтас ғылыми бағытты құруды талап етеді. Оның мұрасы зерттеушілердің үнемі назарын аударған. Әбіш Кекілбаевтың шығармашылығына арналған кандидаттық және докторлық диссертациялар қорғалды, оның өмірі мен шығармашылығы туралы көптеген мақалалар жарық көрді. Әрбір жарияланым өз міндетін атқарады. Көптеген зерттеулердің тақырыбы – Кекілбаевтың прозасы. Зерттеушілер оны негізінен жазушы, көркем сөз шебері ретінде көрсеткен”, деді Тоқаев.
Сауытбек Әбдірахмановтың кітабы – Әбіш Кекілбаевтың ойшылдық дарындарын жан-жақты талдайтын, терең әрі кең ауқымды еңбек. Бұл кітап «Кекілбаевтану» ғылыми бағытын жаңа мазмұнмен байытады, оны шығармашылық рухтың нағыз корифейі ретінде көрсетеді. Онда өте көлемді фактілік материал негізінде Әбіш Кекілбаевтың өнертанушылық, әдебиеттанушылық, тарихнамалық, саясаттанушылық, философиялық қырлары, оның энциклопедиялық білімдері мен академиялық әмбебаптығы кеңінен ашылған.
Қуантарлық жайт, бұл кітап бұған дейін Қазақстан Республикасының әдебиет және өнер саласындағы Абай атындағы Мемлекеттік сыйлығына ие болып, бірнеше рет қазақ тілінде басылып шыққан болса, енді орыс тілді оқырмандарға да қолжетімді болмақ.
