Президент Қасым-Жомарт Тоқаев 2025 жылдың наурыз-маусым және қыркүйек-желтоқсан айларында азаматтарды мерзімді әскери қызметке шақыру туралы жарлыққа қол қойды, деп хабарлайды "Адырна" ұлттық порталы Ақордаға сілтеп.
Заңға сәйкес, 2025 жылдың көктемі мен күзінде әскери қызмет мерзімі аяқталған сарбаздар запастағы құрамға шығарылатын болады.
18-27 жас аралығындағы, кейінге қалдыру немесе босату құқығы жоқ ер азаматтар ҚР Қарулы Күштері, ІІМ (Ішкі істер министрлігі), ТЖМ (Төтенше жағдайлар министрлігі), ҰҚК (Ұлттық қауіпсіздік комитеті) және Мемлекеттік күзет қызметінің қатарына шақырылады.
Жергілікті әкімдіктер әскери басқару органдары арқылы азаматтарды шақыру жұмыстарын ұйымдастыратын болады.
Мерзімді әскерге шақыру туралы жарлық ресми жарияланған күннен бастап күшіне енеді.
