Ресей президентінің баспасөз хатшысы Дмитрий Песков Владимир Путиннің АҚШ президенттік сайлауында жеңіске жеткен Дональд Трампты құттықтау жоспары жоқ екенін мәлімдеді, деп хабарлайды "Адырна" ұлттық порталы Kazinform агенттігіне сілтеме жасап.
Кремльдің ресми өкілі бұл жағдайдың «Ресейге достық пейілі жоқ елге» қатысты екенін еске салды.
"АҚШ президентін сайлау — бұл АҚШ-тың ішкі мәселесі", - деп атап өтті Песков.
Ол сондай-ақ Дональд Трамптың АҚШ президенті қызметіне ресми түрде кірісуін күту қажеттігін еске салды.
Песковтың айтуынша, АҚШ пен Ресей арасындағы қарым-қатынас тарихи тұрғыда ең төменгі деңгейде тұр және одан әрі нашарлату мүмкін емес деуге болады. Песков Путиннің әділдікке, теңдікке және екі елдің ортақ мүдделеріне негізделген сындарлы диалогқа дайын екенін бірнеше рет айтқанын еске салды.
Бұған дейін республикалық партияның кандидаты Дональд Трамп Америка Құрама Штаттарының президенті болып сайланғанын жазған едік.
