Мемлекет басшысы Қасым-Жомарт Тоқаев Америка Құрама Штаттары Президентінің сайлауында айқын жеңіске жеткен Дональд Трампқа құттықтау жеделхатын жолдады, деп хабарлайды «Адырна» ұлттық порталы Ақорда баспасөз қызметіне сілтеп.
Қазақстан Президенті қауіпсіздік, ядролық қаруды таратпау, инвестиция салаларындағы екіжақты ынтымақтастық дәйекті түрде дами беретініне сенім білдірді.
Қасым-Жомарт Тоқаев Дональд Трампқа Америка халқының өсіп-өркендеуі жолындағы, сондай-ақ жаһандық тұрақтылық пен қауіпсіздікті қамтамасыз етудегі қызметіне табыс тіледі.
Бүгін Президент Қасым-Жомарт Тоқаев Түркі мемлекеттері ұйымының саммитіне қатысу үшін Бішкек қаласына барған еді.
Бішкекте Түркі мемлекеттері ұйымының кезекті XI саммиті өтіп жатыр. Саммиттің тақырыбы – «Түркі әлемін нығайту: экономикалық интеграция, тұрақты даму, цифрлық болашақ және баршаға қауіпсіздік». Саммит жұмысына Ұйымға мүше мемлекеттердің басшылары, сондай-ақ ТМҰ-ның бақылаушы елдерінің көшбасшылары қатысады.
