Үкімет су тасқынының алдын алу үшін өзен-сулардағы су деңгейін анықтайтын батиметриялық зерттеулерге 576 млн теңге бөлді. Қаулыға премьер-министр Олжас Бектенов қол қойған, деп хабарлайды “Адырна” ұлттық порталы.
Ақпаратқа сәйкес, бөлінген қаржыны су ресурстары және ирригация министрлігі алады.
«Қаржыландырудың негізгі бөлігі жабдықтар мен техникалық жарақтарды сатып алуға, сондай-ақ зерттеулерге бағытталады. Атап айтқанда, осы ақшаны «Қазсушар» компаниясының «Су метрология» филиалына беріп, еліміздің солтүстік, батыс және орталық өңірлердегі су тасқыны қаупі бар учаскелеріне батиметриялық зерттеу жүргізу көзделіп отыр», - деп хабарлайды үкімет.
Сонымен қатар, өзен-сулар биыл да, 2025 жылы да зерттелуі керегі айтылды. Зерттеудің деректері цифрлық даму, инновациялар және аэроғарыш өнеркәсібі министрлігі мен «Қазақстан Ғарыш Сапары» компаниясына беріледі.
