Ішкі істер министрі Ержан Сәденов бүгін, 17 тамызда Жамбыл облысында қаза тапқан полицейлердің отбасыларына көңіл айтты, - деп хабарлайды “Адырна” ұлттық порталы.
«Меркі-Шу-Бурылбайтал» тас жолында азаматтардың қауіпсіздігін қамтамасыз ету жолында қызметтік борышын өтеу кезінде қайғылы қазаға ұшыраған полиция қызметкерлерінің елге сіңірген еңбегі ұшан-теңіз», - деп жазды ол әлеуметтік желідегі парақшасында.
Сәденов қаза болғандардың отбасыларына «толық қолдау және қажетті көмек көрсетуге» уәде берді.
Сондай-ақ ол 16 тамыздан 17 тамызға қараған түні орын алған жантүршігерлік апатқа қатысты тергеу барысын қадағалап отырғанын айтты.
Естеріңізге сала кетейік, республикалық маңызы бар Меркі – Шу – Бурылбайтал тас жолының 40-шы шақырымында екі көлік соқтығысқанын жазған болатынбыз. Апат салдарынан екі полицей қызметкері және тағы 4 адам қаза тапқан болатын. Қызметкерлердің бірінің 11 баласы бар екені айтылған еді.
