“Бүркітші қыз” атанған қандасымыз Айшолпанның отбасы Қазақстанға көшіп келді, деп хабарлайды “Адырна” ұлттық порталы ҚазАқпаратқа сілтеп.
«Мен Қазақстандамын, бір аптадай бұрын ата-анам мен бауырларым көшіп келді. Өзім Алматыдағы С. Демирел атындағы университетте қазақ тілі мен әдебиеті мамандығы бойынша 4-курста оқимын. Қазір мамандығым бойынша жұмыс қарастырып жатырмын», - деді Айшолпан Kazinform тілшісіне берген сұхбатында.
Сондай-ақ отандасымыз бүркіт баптау өнерін тастамағанын айтты.
«Оқу мен бүркітпен айналысуды қатар алып жүрмін. Аптасына бір рет айналысамын. Жарыстарға қатысып жүрген жоқпын, тек қонақ ретінде барамын. Себебі оқудан қол тимейді», - дейді бүркітші қыз.
Еске салсақ, 2018 жылы қарашада бүркітші Айшолпан туралы фильм шыққан болатын. Ал 2019 жылы Моңғолия композиторы жерлесіміздің құрметіне өз туындысын арнады. Сондай-ақ 2022 жылы бүркітші Айшолпан туралы ағылшын тілінде кітап шықты.
