Қазақстанда отбасылық жанжал салдарынан 69 әйел қайтыс болған, деп хабарлайды "Адырна" тілшісі.
Былтыр елімізде отбасындағы ұрыс-керіс салдарынан 69 әйел мен 7 бала көз жұмған. Бұл деректі ҚР Сенат депутаты Жанна Асанова хабарлады.
2023 жылы Қазақстанда тұрмыстық зорлық-зомбылықтан 69 әйел, 7 бала қайтыс болған. Тұрмыстық зорлық дерегі бойынша 99 мыңнан аса хабар түскен. Балаларға қарсы 2 452 қылмыс жасалған. Бірнеше резонанс тудырған жағдай болды, - деді депутат.
Депутаттың сөзінше, Сенаттағылар Үкіметке мәселеге қатысты сауал жолдаған.
Депутаттар ұсынған заң жобасында зорлық-зомбылықты криминализациялау, яғни ұрып-соғу және денсаулыққа жеңіл зиян келтіргені үшін қылмыстық жауапкершілікке тарту қарастырылған. Одан бөлек, балаларға қатысты зорлық-зомбылықтың барлық нысандары үшін жазаны қатаңдату және тараптардың татуласуын болдырмау да қамтылған.
